New York Times газетасининг расмийларга таяниб ёзишича, Ғазо фуқаролари учун барча зиёрат визалари тўхтатилганини эълон қилган АҚШ маъмурияти бу борада яна бир қадам ташлаган.

АҚШ Давлат департаменти 18 август куни ўзининг барча элчихоналарига Ғарбий Соҳил ва Фаластин диаспорасидан келган шахслар учун иммиграцион бўлмаган визани расмийлаштиришни тўхтатиб қўйиш ҳақида буйруқ берди.

Ушбу ҳаракат Фаластин визаси эгаларига АҚШга даволаниш, университет таълими, ташрифлар ва иш сафари каби мақсадларда келиш учун бериладиган визага таъсир қилади.

АҚШ Давлат департаменти 29 август куни Ню-Ёркда сентябрь ойида Бирлашган Миллатлар Ташкилоти (БМТ) Бош Ассамблеясининг 80-сессиясида иштирок этиш учун АҚШга келиши керак бўлган Фаластин расмийларининг визалари бекор қилинганини маълум қилди.

“АҚШ қонунчилигига мувофиқ, Давлат котиби Марко Рубио яқинлашиб келаётган Бирлашган Миллатлар Ташкилоти Бош Ассамблеяси олдидан Фаластин Озодлик Ташкилоти ва Фаластин маъмурияти аъзоларига виза беришни рад этди ёки бекор қилди”, — дейилади хабарда. АҚШнинг бу қарори Фаластин томонида норозилик уйғотди.

АҚШ Давлат департаменти 16 август куни Ғазо аҳолисига барча турдаги ташриф визалари беришни тўхтатганини эълон қилганди.

• АҚШ
• Фаластин
• Виза