Маълум бўлишича, Фармацевтика саноатини ривожлантириш агентлиги собиқ директори Сардор Кариев 18 йил, “Quramax Medikal” директори Рагневдра Пратар эса 20 йил муддатга озодликдан маҳрум қилинди. Унинг ўринбосарлари бўлган Амирхон Азимов ва Нодирбек Мусаевга ҳам 16 йилдан озодликдан маҳрум қилиш жазоси тайинланган.

Тайинланган жазоларни умумий тартибли колонияларда ўташ белгиланган.

Маълумот учун, мазкур иш доирасида фармацевтика соҳасида фаолият олиб борган 23 нафар шахс суд олдида жавоб берди.

Улар Ҳиндистонда ишлаб чиқарилган, таркибида заҳарли моддалар бўлган “Док-1 Макс” сиропи ва бошқа дори воситаларини юртимизга олиб кирган ҳамда дорилар таркибини текширишга масъул бўлган шахслардир.

Масъул шахсларнинг масъулиятсизлиги ортидан мазкур дори воситаларини истеъмол қилган 86 нафар бола жабрланди. Улардан 68 нафари вафот этган ва 16 нафари оғир, 2 нафари енгил тан жароҳати олган.

2022 йилнинг куз ойларида юз берган мазкур нохуш воқеа ортидан Давлат хавфсизлик хизмати жиноят иши қўзғатиб, тергов ҳаракатларини олиб борди.

Суд мажлисига раислик қилувчи Тошкент шаҳар судининг жиноят ишлари бўйича судлов ҳайъати судьяси Мусо Юсупов суд қарорини ўқиб эшиттирди.

• Dok-1 Maks
• Суд
• Тошкент