Ўзбекистон Марказий банки бошқаруви қарорига кўра, жорий йил 22 апрелдан бошлаб мобил банк иловаларидан фойдаланиш учун телефон рақами айнан фойдаланувчи номига расмий рўйхатдан ўтказилган бўлиши шарт.

Ҳужжатда кредит ва тўлов ташкилотларининг сайт ҳамда мобил иловаларида фойдаланувчиларни рўйхатдан ўтказиш тартиблари аниқ белгилаб берилган. Унга кўра, рўйхатдан ўтиш жараёнида фойдаланувчининг телефон рақами унинг жисмоний шахсий идентификация рақами (ЖШШИР) билан мос келиши текширилади.

Агар ушбу маълумотлар мос келмаса, фойдаланувчига мобил иловада рўйхатдан ўтишга рухсат берилмайди ва бу ҳақда SMS орқали хабарнома юборилади.

Шунингдек, банк картасини иловага бириктириш жараёни алоҳида тартибда – ОТР-код киритиш ҳамда биометрик идентификациядан ўтиш орқали амалга оширилади. Агар телефон рақами банк картасига уланган SMS-хабарнома рақами билан мос келмаса, картани улаш жараёни тўхтатилади.

Фақат фойдаланувчининг ўзига тегишли бўлган (яқин қариндошлари бундан мустасно) банк ҳисобварақлари, карталари ва электрон ҳамёнларини бириктиришга, шунингдек жисмоний шахслар ўртасида нақд пулсиз пул ўтказмаларини амалга оширишга йўл қўйилади.

Яқин қариндошлар қаторига ота-оналар, туғишган ва ўгай ака-укалар ҳамда опа-сингиллар, эр-хотинлар, болалар (жумладан фарзандликка олинганлар), боболар, бувилар, неваралар, шунингдек эр (ёки хотин)нинг ота-оналари ва опа-укалари киради.

• Марказий банк
• Қарор
• Telefon
• identifikatsiya
• ilova