Болгариянинг София шаҳрида эркин кураш бўйича U-20 Жаҳон чемпионати бўлиб ўтмоқда.

Унда дунёнинг 50 дан ортиқ мамлакатидан келган спортчилар қаторида бизнинг 6 нафар ҳамюртимиз ҳам ватанимиз шарафини муносиб ҳимоя қилишмоқда.

Мусобақа ўзбекистонлик полвонлар учун омадли бошланди. Дастлабки кунги беллашувларда уч нафар спортчимиз -57, -65 ҳамда -70 кг вазн тоифаларида гиламга чиқди.

-57 кг вазн тоифасидаги вакилимиз Наимов Азизбек илк баҳсда швейцариялик рақибини мағлубиятга учратди. Афсуски, 2-даврада АҚШ вакилига 7-2 ҳисобида ютқазиб қўйди.

-65 кг вазн тоифасидаги ватандошимиз Жалолов Умиджон дастлаб қирғизистонлик курашчини 10-2 ҳисобида, сўнгра чилилик рақибини 10-0, 3-давра баҳсида Япония терма жамоаси вакилини ҳам 10-0, ярим финалда эса америкалик полвонни 4-0 ҳисобида мағлубиятга учратди.

Ҳал қилувчи финал баҳсида эса озарбайжонлик Зираддин Байрамов билан бўлган беллашувда соф ғалабага эришиб, олтин медаль соҳибига айланди.

Шунингдек -70 кг вазн тоифасида Бегижон Қўлдошевга бироз омад етишмади. У илк саралаш баҳсида эронлик курашчига 3-1 ҳисобида имкониятни бой бериб қўйди. 

Ўз навбатида эронлик курашчи ҳам АҚШ вакилига ютқазиб қўйди. Шу тариқа Қўлдошев баҳслардан чиқиб кетди.

Эслатиб ўтамиз, мусобақа 21 августга қадар давом этади.

• Жаҳон чемпионати
• Кураш
• Ўзбекистон