67 ёшли Голливуд юлдузи Брюс Уиллис оиласи актёрга манглай-чакка деменция (фронтотемпорал деменция) ташхиси қўйилган.

Қайд этилишича, ҳозирда касаллик тобора ривожланиб бормоқда. 2022 йил март ойида Уиллиснинг яқинлари у нутқининг бузилиши сабаб актёрлик карьерасини якунлаётганини эълон қилганди.

“2022 йилнинг баҳорида Брюсга ташхис қўйилганидан бери унинг аҳволи яхшилана бошлаган эди. Бизда энди аниқроқ ташхис бор: бу фронтотемпорал деменция. Афсуски, нутқдаги муаммолар Брюс дуч келган касалликнинг дастлабки аломатларидан биридир. Бу оғриқли бўлса-да, ниҳоят аниқ ташхис қўйиш бироз енгиллик туғдиради. Бугунги кунда бу касалликнинг давоси йўқ ва келгуси йилларда бу ҳақиқат ўзгаришига умид қиламиз”, – Уиллиснинг собиқ рафиқаси Деми Мур, ҳозирги рафиқаси Эмма Хеминг ва беш нафар қизи томонидан тақдим этилган баёнотда.

Ушбу касаллик асосан инсоннинг характерига, унинг хатти-ҳаракати ва нутқига таъсир қилади. 60 ёшдан кичик одамларда фронтотемпорал деменциянинг энг кенг тарқалган шакли ҳисобланади.

Актёр оиласидагиларнинг таъкидлашича, Брюс ҳар доим ҳаётдан қувонч топиб келган ва ўзи билган ҳар бир кишига ҳам шундай имконият бўлишида ёрдам берган.

Эслатиб ўтиш мумкин, Уиллис ўтган йилнинг март ойида кино оламини тарк этди. Сўнгра маълум бўлишича, шифокорлар унга афази (мия шикастланганидан кейин пайдо бўлиши мумкин бўлган орттирилган нутқ бузилиши) ташхисини қўйишган.

Уиллиснинг дастлабки ташхиси шуни кўрсатдики, у гапириш, ёзиш ва тилни тушунишда қийналган. Бироқ, шундай мураккаб аҳволига қарамай, актёр омма олдида чиқишда давом этаверган.

Актёр, продюсер ва мусиқачи Уиллис Голливуддаги энг кўп маош олувчи ижодкорлардан бири бўлган. У “Қаттиқ ёнғоқ” сериалидаги полиция зобити Жон Маклейн роли, шунингдек, “Олтинчи ҳиссиёт”, “Бешинчи элемент”, “12 маймун”, “Охирги бойскаут”, “Армагеддон”, “Слевиннинг омадли сони” ва “Жиноий чўпчак” каби ўнлаб фильмлар орқали танилган.

Фаолияти давомида, “Олтин Глобус” ва “Эмми” сингари мукофотларни қўлга киритган.

• Касаллик
• aktyor
• голливуд
• саломатлик