Американинг машҳур “Симпсонлар” мультсериали шу пайтга қадар ўзининг турли хилдаги башоратлар акс этган эпизодлари билан мухлисларни ҳайратда қолдириб келган. “Симпсонлар” мультсериали 1989 йилдан бошлаб эфирга узатила бошланган. Анимация 31 та мавсум ва 677 та қисмдан иборат. 1998 йилда Times журнали “Симпсонлар”ни ХХ асрнинг энг яхши телесериали деб атади.

Мультсериалнинг кўплаб эпизодларида келажакда рўй берувчи машҳур воқеа ва ҳодисалар башорат қилинган. Бу қанчалик ҳақиқат? Ҳозир ушбу анимациядаги энг ҳайратланарли эпизодлар ҳақида маълумот берамиз.

Ақлли соатлар

“Симпсонлар”нинг 1995 йилда эфирга узатилган қисмларидан бирида бош қаҳрамонлардан бири Лиза 15 йил олдинга, яъни 2010 йилга саёҳат қилиш учун фолбинга боради ва ушбу эпизодда ақлли қўл соати кўрсатиб ўтилади. Бироқ замонавий соатлар 2010 йилдан эмас, балки 2014 йилдан ишлаб чиқарилиши бошланган. Балки мультсериал ихтирочилар учун тайёр ғоя вазифасини ўтагандир.

Эбола вируси

Мультсериалнинг 1997 йилда тақдим этилган 9-мавсумида сериал қаҳрамонларидан бири тушкунликка тушган ўғлига Эбола вируси ҳақидаги китобни ўқишни маслаҳат беради. Орадан 16 йил ўтгач Африканинг бир қатор Ғарбий мамлакатларида ушбу вирус авж олади.

Зигфрид ва Рой

Турли хил кўнгилочар чиқишлари билан машҳур бўлган Зигфрид ва Рой дуэти 1993 йилги мавсумда эслаб ўтилган. Эпизодлардан бирида уларга оқ йўлбарс ҳужум қилади. Ҳақиқий ҳаётда эса 2003 йилги чиқишлардан бирида оқ бенгал йўлбарси Ройга ҳужум қилиб унинг томоғини тишлаб олади.

Трампнинг президент бўлиши

Американинг собиқ президенти Доналд Трампни ҳукуматга келишидан 16 йил олдин “Симпсонлар” мультсериалида ушбу воқеа башорат қилинган. 2000 йил тақдим этилган 11-мавсумда Трамп АҚШ президенти сифатида кўрсатилган.

“Титан” батискафининг чўкиши

Яқинда содир бўлган ушбу ҳодиса ҳам кўплаб инсонларда шубҳа уйғотди. OceanGate компаниясига тегишли “Титан” батискафи бир нечта миллиардерларни сув остига ўзи билан олиб кетди. Бундан асосий мақсад чўкиб кетган Титаник кемасига саёҳат уюштириш эди. 2006 йилда эфирга узатилган “Симпсонлар” мультсериалида ушбу воқеага ўхшаш эпизод борлиги маълум бўлди.

• Lifestyle
• Мултфильм
• қизиқарли