Душанба куни Ҳиндистон Тиббиёт Кенгаши (NMC) тиббиёт йўналишидаги абитуриентларга Марказий Америкадаги учта ва Ўзбекистондаги битта тиббиёт университетига бакалавриат даражасида тиббий таълим олмасликни қатъий тавсия қилди.

NMC хабарига кўра, огоҳлантиришга амал қилмасдан ушбу таълим муассасаларида ўқиган талабаларга Ҳиндистонда тиббиёт амалиётини рўйхатдан ўтказишга рухсат берилмайди.

Гап қуйидаги таълим муассасалари ҳақида бормоқда:

– Central American Health and Sciences University, Beliz;

– Columbus Central University, Белиз;

– Washington University of Health and Sciences, Beliz;

– Тошкент Давлат Тиббиёт Университетининг Чирчиқ филиали, Ўзбекистон.

Бу огоҳлантириш Ҳиндистоннинг Мексикадаги элчихонаси ҳамда Ташқи ишлар вазирлигининг Евроосиё бўлими ушбу таълим муассасалари Ҳиндистоннинг тиббий таълим стандартларига жавоб бермаслиги бўйича жиддий хавотир билдирганидан сўнг чиқарилган.

NMC томонидан эълон қилинган огоҳлантиришда шундай дейилади: “Тиббиёт йўналишида чет эл университетларига ўқишга киришни режалаштираётган абитуриентлар ва уларнинг ота-оналари, NMC расмий веб-сайтида 2025 йил 19 май санасида жойлаштирилган огоҳлантиришни диққат билан ўқиб чиқишлари керак”.

Мазкур огоҳлантириш тан олинган муассасалар, талаб қилинадиган мезонлар ва бошқа муҳим йўриқномалар ҳақида муҳим маълумотларни ўз ичига олади.

NMC шу каби огоҳлантиришларни илгари ҳам эълон қилган — 2023 йил 8 августда ва 2024 йил 22 ноябрда.

Ушбу хабарномаларда Ҳиндистонлик талабаларга чет элда тиббиёт йўналишида ўқиб, Ҳиндистонда аллопатик тиббиёт билан шуғулланиш учун рўйхатдан ўтиш истагида бўлсалар, 2021 йил 18 ноябрда кучга кирган FMGL (Foreign Medical Graduate Licentiate) Қоидаларига қатъий риоя қилиш кераклиги таъкидланган эди.

НМC огоҳлантирувига кўра: “Талабалар аниқ огоҳлантирилган — курс давомийлиги, ўқитиш тили, ўқув дастури ва амалиёт, клиник тренинг ёки интернатура бўйича ҳар қандай четга чиқиш — Ҳиндистонда тиббиёт амалиётини рўйхатдан ўтказишда рад этилишига олиб келади”.

Шунга қарамай, ҳинд талабалар ҳалигача FMGL қоидаларига мос келмайдиган хорижий университетларга ўқишга киришда давом этмоқда.

Мексикадаги Ҳиндистон элчихонаси ва ТИВнинг Евроосиё бўлими томонидан билдирилган хавотирлар орасида қуйидагилар бор:

– Ҳинд тиббий таълим стандартларига мос келмаслик;

– Етарли ёки ишлаётган кампус инфратузилмасининг йўқлиги;

– Сифат даражаси паст бўлган таълим ва клиник тренинг;

– Ҳинд талабалари билан салбий муносабат, тазйиқ ва тазйиқ ҳолатлари;

– Ҳаддан ташқари юқори тўловлар ва курсдан чиқиш ҳолатларида тўловларни қайтармаслик.

Шу сабабли, талабалар ушбу таълим муассасаларига ўқишга киришдан қатъий равишда тийилиши керак.

• Ҳиндистон
• Ўзбекистон
• Талабалар