Хитойнинг технология ишлаб чиқарувчи энг йирик корпорацияларидан бири ҳисобланган Huawei тақдимотида ақлли кўзойнакларнинг иккинчи авлоди бўлган “Eyewear 2” намойиш этилди, унинг янада мураккаб дизайн ва янги рамкали вариантлари – титан ва тилла билан қопланган.

Титан версиясида оғирлиги атиги 4,7 грамм бўлган енгил б-титанли рамка мавжуд, олтин версияда эса 18 карат олтин қоплама ва замонавий юпқа рамкалар мавжуд. “Eyewear 2”ни фойдаланувчиларга қулайроқ қилиш учун Huawei биринчи версияга нисбатан қулоқчинлар кенглигини 20 фоизга қисқартирди, натижада қурилманинг максимал эни 9,7 миллиметрга, орқа эни эса 28 фоизга ёки 8,3 миллиметрга қисқарди.

Биринчи версия каби, янги қурилма ҳам мусиқа ва қўнғироқларнинг бошқаларга эшитилмаслигини таъминлайди. “Huawei Eyewear 2”да олдинга йўналтирилган икки диафрагмали аудио блоки мавжуд бўлиб, у динамик амплитудасини 40 фоизга, ижро ҳажмини эса 30 фоизга оширади. Кўзойнаклар, шунингдек, уч марта шовқинни камайтириш тизими билан жиҳозланган бўлиб, гаплашаётганда овозни аниқ эшитиш имконини беради.

Яхшиланган датчиклар сенсорли бошқарув майдонини 23 миллиметрга оширади, бу аввалги моделга нисбатан 50 фоиз каттароқ дегани. Ишлаб чиқарувчининг таъкидлашича, бу тасодифий тегиниш хавфини ҳам минимал даражада камайтиради.

Кўзойнаклар бир вақтнинг ўзида бир нечта қурилмаларга узлуксиз уланишни қўллаб-қувватлайди. Улар “HarmonyOS”да бир нечта гажетлар ўртасида тез алмашишни таъминлайди, лекин Android, iOS ва Windows билан ҳам “тил топиша олади”.

Автономияга келсак, янги кўзойнаклар мусиқа ёки подкастларни 11 соат тинглаш (аввалги авлодга қараганда 83 фоизга кўпроқ) ёки 9 соат суҳбатлашиш имконини беради. Тўлиқ зарядлаш 50 дақиқа давом этади ва атиги 10 дақиқа зарядлаш 3 соат тинглаш учун етарли. Корпус чанг ва намликдан ҳимояланган (IP54).

Маълумот учун, “Huawei Eyewear 2” биринчи авлод каби 1699 юань (тахминан 2 850 000 сўм) нархда стандарт рамка вариантларини таклиф этади, 18 каратли тилла рамкалиси эса 1899 юанга (3 180 000 сўм), титан рамкали қурилма эса 2299 юанга (3 850 000 сўм) баҳоланмоқда. Хитойда сотувлар 30 сентябрь куни бошланади, глобал версиясининг сотувга чиқарилиши ҳали эълон қилинмаган.

Шунингдек, компания янги “FreeBuds Pro 3” симсиз қулоқчинларни ҳам расман тақдим этди. Бу флагман сериясидаги модел бўлиб, ташқи томондан, аввалгисидан деярли фарқ қилмайди, аммо яшил ранг варианти пайдо бўлди.

“FreeBuds Pro 3”нинг янгилиги шундаки, қайта зарядлашни ҳисобга олган ҳолда у 33 соат доимий ишлаши мумкин. Ҳатто йўқолган тақдирда ҳам, овозли сигнал ёрдамида уни осон топиб олиш мумкин. Бошланғич нархи тахминан 1499 юанга (2 500 000 сўм) баҳоланган.

• Huawei
• Хитой
• технология