Давлат хавфсизлик хизматининг Наманган вилояти бўйича бошқармаси, Чегара қўшинлари ҳамда вилоят ички ишлар бошқармаси ходимлари ҳамкорлигида Косонсой туманида ўтказилган тезкор тадбирда, қўшни Қирғиз Республикасидан айланма йўллар орқали Ўзбекистонга қонунга хилоф равишда олиб ўтилган кўп миқдордаги қимматбаҳо металл савдосига чек қўйилди. Бу ҳақда ДХХ матбуот хизмати хабар берди.

Косонсой туманида яшовчи, 1996 йилда туғилган фуқаро тоғаси 1988 йилда туғилган шахснинг кўрсатмасига асосан давлат чегарасини ноқонуний тарзда  кесиб ўтиб, Қирғиз Республикасидан Ўзбекистонга ҳудудига тахминий суммаси 1,1 млрд сўм бўлган умумий оғирлиги 1 кг 168 гр миқдоридаги олтин қуймаси парчаларини олиб киргани ҳақида тезкор маълумот олинган.

Ҳамкорликдаги тадбир давомида у олтинларни ушбу туманда яшовчи, бошқа бир қариндошига етказиб берган вақтида жиноят устида қўлга олинади.

Ушбу шахсларга нисбатан Жиноят Кодексининг 182-моддаси 2-қисми “а”, “б” бандлари ва 223-моддаси 2-қисми “б” банди билан жиноят иши қўзғатилиб, тергов ҳаракатлари олиб борилмоқда.

• ДХХ
• Жиноят
• Наманган
• Олтин