Суҳбат ишга жойлашишдаги энг муҳим жараён ҳисобланади. Ҳаттоки, тестлардан муваффақият билан ўтадиган тажрибали иш қидирувчилар ҳам интервьюдан “йиқилишлари” мумкин. Бундай ҳолатлардан қочиш учун рекрутер (маълум бир лавозимларга номзодларни излайдиган мутахассис) билан суҳбатда нафақат ташқи кўриниш, балки, нутқингизга ҳам эътибор беришингиз керак. Интервьюдан омадли ўтиб, ишга қабул қилинишингиз учун қандай жумла ва саволлар ишлатмаслик ҳақида эса, қуйида ўқинг.

1.  “Компаниянгиз нима билан шуғулланади?”

Ҳар бир иш қидирувчи ёдда сақлаши керак бўлган нарсалардан бири бу – жойлашмоқчи бўлган жойи ҳақидаги маълумотларни мустақил равишда излаш кераклигидир. Суҳбат ўтказадиган менежер сиз билан интервьюни ўтказиш учун резюменгиз билан танишиб чиққан, сиз билан боғланган ва қулай вақтни белгилаган. Сиз ҳам учрашувга тайёрланишингиз иккала томон учун ҳам адолатли бўлади. Шунингдек, бу ҳаракатингиз билан иш берувчиларга уларга билдирган қизиқишингиз ва мустақил ҳаракатлана олишингиз мумкинлигини тушунтирган бўласиз. Шу сабабли ҳам, суҳбатдан омадли ўтиш учун аввалдан берилиши керак бўлган, ўзингиз қизиққан саволларни тайёрлаб бориш муҳим ҳисобланади.

2.  “Эски бошлиғим билан келиша олмас эдим”

Суҳбат давомида иш берувчи аввалги иш жойингиздан нега бўшаганингиз сабаби билан қизиқиб қолиши мумкин. Бундай ҳолатларда, аввало, ҳатто эски бошлиғингиз билан яхши келишмаган бўлсангиз-да, у ҳақида салбий фикрлар билдирмаслик ва шахсиятига ўтмаслик муҳим ҳисобланади. Улар ҳақидаги шахсий салбий фикрингизни билдирган ҳолингизда, ўзингиз ҳақингиздаги яхши таассуротни бузиб қўйишингиз мумкин.

3.  “Перфекционист ва меҳнаткашман”

“Жуда меҳнаткаш ва перфекционистман” жумласи сиз яхши ходим эканлигингизни билдирмайди. Аксинча, бу “мен заиф томонларимни тан ололмайман ва менда сурункали хавотир мавжуд” деганидир. Унутмангки, ортиқча меҳнаткашлик ва перфекционизм ишингизни тўғри ҳамда яхши бажаришингизда халақит беради. Шунингдек, бу сифатлар сизда бор эканлиги кареравий ўсишга тез эришасиз дегани эмас.

Агар сиздан салбий сифатларингиз ҳақида сўрашса, нафақат камчиликларингиз ҳақида, балки улар билан қандай курашишингиз ёки топган ечимларингиз ҳақида гапириб беришингиз мумкин.

4.  “Иш таътилига қачон чиқсам бўлади?”

Иш таътиллари тизими қандай тузилганлиги билан қизиқишнинг ҳеч қандай ёмон томони йўқ, албатта. Аммо бу саволни иложи борича бошқа шаклда берган яхшироқ. Масалан, иш таътили тизими қандай тузилганлиги ва жараён қандай бошқарилиши ҳақида сўрашингиз мумкин. Аммо унутмаган яхшики, компания вакили яқин орадаги таътилингиз ҳақидаги саволларни ҳали ишга киришмасдан туриб, дам олиш ҳақида орзу қилаётганингиздек тушуниши мумкин.

5.  “Бу иш менга жуда керак!”

Бу ва бунга ўхшаш жумлалар адолациз иш берувчилар учун оҳанграбодек туйилиши мумкин. Улар сизни ушбу ишга муҳтож деб тушуниб, кам ойлик эвазига ортиқча вақт соати билан ишлатмоқчи бўлишлари мумкин. Шунингдек, бу жумла ҳақиқий мутахассисларни излаётганларни ҳушёр торттириши ҳам эҳтимолдан ҳоли эмас.

6.  “Исталган ишни бажара оламан”

Исталган ишни қила олишингизни айтган ҳолда, сиз иш берувчига жуда ёмон аҳволда эканлигингизни билдирган бўласиз. Шу билан бирга, ҳақ тўланадиган ҳар қандай ишга тайёр эканлигингиз олдингизга қўйилган барча масалаларни ҳал қила оласиз дегани эмас.
Қийин вазиятда турганингизни тушунтириш ўрнига, иш тажрибангиз ва аввалги ишингиздан ўзлаштирган кўникмаларингиз ҳақида гапириб беринг.

7. “Ҳеч қандай саволларим йўқ”

Ҳаттоки сизда ҳеч қандай савол бўлмаса-да, мутахассислигингиз юзасиздан бир нечта саволлар беришга тайёрланинг. Бу билан сиз ишга ҳақиқатан қизиққанингиз ва ишлаш тизимини ўрганишини хоҳлаётганингизни билдирасиз. Шунингдек, ҳаддан ортиқ кўп саволлар бериш ҳам ярамайди. Масалан, сизга таклиф қилинаётган лавозимга яна қанча вариантлар бор эканлиги ёки офис ошхонасида кофемашина бор-йўқлигини сўраш ноўрин ҳисобланади.

• Иш стажи
• Job interview