Шу йилнинг 11 сентябрь куни Қозоғистоннинг Олмаота вилоятида металл қабул қилиш шохобчасида содир бўлган портлаш оқибатида 3 нафар ўзбекистонлик ҳалок бўлди. Бу ҳақда Zakon.kz хабар бермоқда.

“Олмаота вилоятининг Илий туманида жойлашган металл қабул қилиш шохобчаларидан бирида юз берган фожиали ҳодиса бўйича полиция жиноят иши қўзғатди. Номаълум предмет портлаши оқибатида уч киши жасади ҳаёт аломатларисиз топилди. Ҳодиса жойига дарҳол тезкор хизматлар – полиция, ёнғин хавфсизлиги ходимлари ва тез тиббий ёрдам бригадаси етиб борди”, – дейилади нашр хабарида.

“Бизнинг ортимизда цех бор. Уни хитойликлар ижарага олган. Афтидан, улар ўз вақтида арзон нархда металлолом сотиб олишган. Ўзлари ҳам билишмаган. Шулар орасида Мудофаа вазирлигидан чиққан металл чиқиндилари бўлиши мумкин. Лекин улар орасида портламаган миналар ҳам чиққан, деб ўйлайман. Ҳозир барча куч тузилмалари келган, текширишмоқда”, – дея маълумот берган шохобча эгаси Амирбек Шербаев.

Nur.kz’га кўра, воқеа жойида криминалистлар ва Мудофаа вазирлиги вакиллари ишламоқда. Ҳудудга ҳеч ким киритилмаяпти. Ҳалок бўлганларнинг шахси аниқланган. Улар ишчилар экани ва барчаси Ўзбекистон фуқаролари экани маълум қилинган.

• Ўзбекистонлик
• Қозоғистон
• fuqaro
• portlash