Исроил авиацияси 20 июль куни Яман ғарбидаги Ҳудайда порт шаҳрига ҳужум уюштирди. Бу ҳақда Al Arabiya нашри маълум қилди.

Манбада айтилишича, ҳужумлар асосан нефть иншоотларига қаратилган. Ҳудайда шаҳрига яқин нефть омборлари ва электр тизимлари портлатилиб, вайрон қилинган.

Ҳужумда Исроил ҳарбий-ҳаво кучларининг 12 та жанговар самолёти, жумладан, бешинчи авлод F-35I Адир қирувчи самолётлари иштирок этган.

Нетаняху Яманнинг Ҳудайда портига ҳужумни ҳусийларнинг Тел-Авивга дрон ҳужуми ва бошқа юзлаб ҳужумларига тўғридан-тўғри жавоб деб атаган.

Исроил бош вазирининг сўзларига кўра, Ҳудайда порти ҳарбий мақсадларда, жумладан, Эрон қуролларини олиб киришда фойдаланилган.

“Исроил ҳар қандай йўл ва воситалар билан ўзини ҳимоя қилади, унга ҳужум қилганлар жуда катта товон тўлайди”, — дея қўшимча қилган Нетаняху.

Шунингдек, ҳусийлар расмийлари Исроил ҳужум учун катта бадал тўлашини билдирган. “Қасос зарбаси” оғир бўлиши, Исроилни ҳимоя қилишга уринганлар ҳам аяб ўтирилмаслиги айтилган.

Бир қанча Яқин Шарқ араб нашрлари Исроил ҳужумлари Ҳудайдадан бошқа Яман ҳудудларида ҳам давом этаётганини билдирган. Ижтимоий тармоқларда тинч аҳоли турар жойларига қилинган ҳужум тасвирлари ҳам пайдо бўлмоқда.

• Binyamin Netanyaxu
• Isroil
• Уруш
• Яман