Кеча, 12 октябрь куни соат тахминан 18:13 да Жиззах вилояти Шароф Рашидов туманида жойлашган пахта қабул қилиш пунктида ғарам ёниб кетган. Бу ҳақда вилоят ФВБ хабар берди.

Қайд этилишича, вилоят Фавқулодда вазиятлар бошқармаси Навбатчилик қисмига Шароф Рашидов тумани “Уч-тепа” МФЙ ҳудудида жойлашган “Жиззах Инстурал Тўқима” МЧЖга қарашли пахта қабул қилиш пунктида ёнғин содир бўлаётганлиги тўғрисида хабар келиб тушган.

Шунга кўра, 4 та ёнғин-қутқарув экипажлари воқеа жойига соат 18:20 да етиб борган ва 18:50 да тўлиқ ўчирилган. Ёнғин натижасида 1 та 14-сонли ғарамнинг устки қисми тўлиқ ва 15-сонли ғарамнинг устидаги “Султон” навли пахта толалари ёнган.

“Ёнғин оқибатида 35-40 килограмм пахта толалари ёниб зарарланган. Ёнғиннинг келиб чиқиш сабаби ва моддий зарар миқдори аниқланмоқда”, – дейилади хабарда.

• Жиззах
• Пахта
• ёнғин