Мексика ҳукумати Конгрессдаги жамоатчилик муҳокамаси чоғида иккита ўзга сайёралик жасадини намойиш этди. Бу ҳақда “Лад Библе” хабар берди.

Маълум қилинишича, ўзга сайёраликлар деб тахмин қилинган жасадларни уфолог (номаълум учар жисмлар тадқиқотчиси) Хайме Мауссан оммага тақдим этган. У ўз нутқида бу икки ашё Перудаги археологик қазишмалар пайтида топилганини айтган. Бу қолдиқларнинг ёши тахминан 1000 йил ҳисобланади. Бундан ташқари, мутахассис қолдиқларни таҳлил қилиш ердаги эволюция элементлари билан номувофиқликни кўрсатганини таъкидлаган.

“Улар конлардан топилган, диатом сув ўтлари билан ўралган ва кейинчалик тошга айланган”, дейди уфолог.

Хайме Мауссан қолдиқларнинг 30 фоизга яқин ДНКсини очишнинг имкони бўлмаганини қўшимча қилган.

Шунингдек, у ўзга сайёраликларнинг ҳар бир қўлида учта бармоқ борлигини таъкидлаган.

“Биз коинотда ёлғиз эмасмиз, бу ҳақиқатни англаб етишимиз керак”, дейди мутахассис.

• Коинот
• Конгресс
• Мексика