Бу аёлнинг исми Мей Маск. У модель ва диэтологдир. Маск хоним “Режали аёл” китобининг муаллифи.  Мей Маск фарзандлари миллиардер бўлиб етишишига катта ҳисса қўшган.

Ҳар биримизнинг ҳаётимизда керак бўладиган қуйидаги тавсиялар билан бўлишган:

1. Барча муаммонинг ечими топилишига ишонинг. “Сочимдаги биринчи оқ тола карерамни ривожлантиришга туртки беради, деб ким ҳам ўйлабди? Ўн беш ёшимда менга ўн саккизга кирмасимдан карьерам тугайди, дейишар эди. Ҳозир етмиш бир ёшимда эса ҳар қачонгидан ҳам машҳурман. Ҳаёт менга барча нарсанинг ечими бор эканлигини ўргатди. Мақсад сари интилишда режаларни ўзгартириш мумкин экан. Ҳа, мен буни аввалроқ англаб етмадим, лекин ҳали ҳам ўрганиш ва билим олишда давом этяпман”, дейди Мей хоним. Унинг фикрича, барча йирик кашфиётлар ёшликда ва навқирон пайтда қилиниши стереотипдир.

2. Ўзингизга сармоя киритинг. “Кўпчилик гўзал кўриниш учун кўп пул керак, деб ҳисоблайди. Сизга узоқ йиллар давомида молиявий қийинчиликни бошидан ўтказган одам сифатида айтаман: кийим-кечак харажатларини йиллик бюджетингизнинг бир қисми сифатида кўриб чиқинг. Худди шу қоида сартарош ва стоматологга ташриф буюриш учун ҳам амал қилади. Аввалдан йиллик бюджетни тузиш ва унга риоя қилиш молиявий саводхонликнинг асосидир.

3. Энг яхшисига эмас, ўзингизга маъқул нарсага интилинг. Ўта перфексионистлар учун тавсия: “Айнан сиз учун керакли ва фойдали бўлган нарсага интилинг ва мутлақо барча ишда энг яхши бўлишга ҳаракат қилманг”.

4. Қизиқишлар пайдо бўлганда иккиланманг. Ривожланиш бўйича миллиардернинг онасидан яна бир тавсия: “Мен ўзимни қизиқтирган бирор нарсага рози бўлишдан олдин узоқ вақт ўйлаб ўтирмайман. Менда қизиқиш уйғотадиган, завқлантирадиган ёки молиявий аҳволимни яхшилайдиган барча ишга “ҳа” дейман”.

5. Муносабатларда зўравонликка ҳеч қачон тоқат қилманг. “Агар омон қолишни истасангиз, сизга зўравонлик қиладиган, ерга урадиган ва доим хафа қиладиган одам билан муносабатлардан воз кечишингиз кераклигини билишингизни хоҳлайман. Никоҳимда тўққиз йил зўравонликка чидадим. Ажрашганимдан кейин елкамдан оғир юк тушгандек бўлди ва ниҳоят келажакка умид билан қарай бошладим”. Мей хонимнинг собиқ турмуш ўртоғи унга тажовузкор муносабатда бўлган, аммо Маск бу воқеани енгиб ўтишга ҳамда ўзи ва уч фарзандининг ҳаётини сақлаб қолишга куч топган.

6. Агар ўзгаришларни истасангиз, режа тузинг. “Ўзингиз истаган ҳар қандай ўзгаришларга етишишдан аввал барча ишга режали ёндашинг. Ҳатто кичик мақсад бўлса ҳам сизга аниқ ва пухта режа керак бўлади”, дейди Маск.

7. Доимо банд бўлинг, шунда ўтиб бораётган ёшингиз ҳақида қайғуришга вақт топа олмайсиз. Ёшимизга қўшилган йилларни юк сифатида қабул қилмаслик учун ажойиб мисол: “Мен ёшим ҳақида қайғурмайман, чунки қалбимга қувонч олиб келадиган муҳим ишларим билан бандман”. Демак, эътиборимизни асосан муҳим нарсаларга қаратишимиз керак.

8. Ўзингизни асранг. Ҳаёт фақат ёшликдаги фаол давр билан чегараланиб қолмайди. Ҳар қандай ёшда ҳам ўзингизни ҳар томонлама ривожлантириш ва соғлиқни сақлашга эътибор бериш муҳимдир. Мей шундай дейди: “Ёш ўтгани саин ҳаётингиз секинлашишига ёки ривожланишдан тўхтаб қолишингизга йўл қўйманг. Ўзингизга иложи борича ғамхўрлик қилишни унутманг: яхши овқатланинг, кўпроқ табассум қилинг ва ўзингизга бўлган ишончни сўндирманг”.

• Фойдали
• Ilon_Mask
• Китоб
• Tavsiya
• reja