Маълумотларга кўра, Москва темирйўлларига қарашли Куряново станциясида поезд остига йиқилиб тушган йигитча омон қолган ва ҳозир тузалмоқда. Бу ҳақда ТАСС хабар бермоқда.

Ижтимоий тармоқларда тарқалган хабарларга кўра, дўстлари билан Куряново бекати платформасида “йигит ҳазил-ҳузул қилаётган вақтда сирпаниб кетган ва поездостига йиқилиб тушиб, вафот этгани” айтилган эди.

“2005 йилда туғилган жабрланувчи Иноземсев номидаги касалхонага ётқизилган. Унинг оёқлари ва тос суяклари синган. Унинг ҳолати барқарор”, — деган агентликнинг шифохонадаги суҳбатдоши.

Москва темирйўллари корхонаси ТАССга воқеа чиндан ҳам содир бўлганини тасдиқлаган.
“МТЙ фуқароларга темирйўл инфратузилмасида хавфсиз юриш-туриш қоидаларига қатъий амал қилишни сўрайди”, — деган Москва темирйўллари корхонаси матбуот хизмати ходими.

Ўзбекистонлик айрим блогерлар жабрланган фуқаро 2004 йилда Қашқадарё вилоятида туғилган, Ўзбекистон фуқароси бўлмиш мактаб ўқувчиси экани ва у олинган жароҳатлардан вафот этгани ҳақида шошилинч хабар тарқатган. Ўзбекистонлик меҳнат мигрантлари турли гуруҳларда марҳумнинг жасадини Ўзбекистонга қайтариш учун пул тўплашаётгани, Ўзбекистоннинг Россиядаги элчихонаси вазият бўйича муносабат билдирмаганини ёзишган. Бироқ поезд остига йиқилган ўқувчининг Ўзбекистон фуқароси экани тўғрисидаги иддао расман тасдиқланмаган.

• Favqulodda holat
• Поезд
• Россия