Кеча, 8 сентябрь куни президент Шавкат Мирзиёев таълим тизимини ислоҳ қилиш масалаларига оид тақдимот билан танишди.

Тақдимот билан Президент Администрацияси раҳбарининг таълим ислоҳоти бўйича ўринбосари Ҳилола Умарова таништирди. Унда “боғча мактаб – олийгоҳ” тизимини қамраб олишга мўлжалланган бир қанча янги ғоялар илгари сурилди.

Жумладан, тақдимотда 12 йиллик таълимга ўтиш бўйича топшириқ берилди.

Бунда айнан мактаблар 12 йиллик таълимга ўтмайди, балки боғчалардаги мактабга тайёрлов гуруҳлари тизими ҳам мактаб таълимига қўшиб юбориш ҳисобига 12 йиллик таълим тизимига ўтилади.

Бу тизимга ўтишнинг афзаллик жиҳатлари ҳақида Мактабгача ва мактаб таълими вазири ўринбосари Сардор Ражабов “Ўзбекистон24” телеканалига берган интервьюсида батафсил айтиб берди.

“Мактабга тайёрлов гуруҳлари ҳозирги кунда мана 100 фоизга яқин қамров амалга ошириляпти. Демак, мана шу тизимни ҳам мактаб таълимига қўшиб туриб 12 йиллик таълимга ўтиш бўйича топшириқ берилди.

Бу ерда бизга асосий фойдаси нима бўлади?

Биринчиси таълим сифати бўладиган бўлса, иккинчиси, бу хорижий олий таълим муассасаларига ўқишга кираётганда бизнинг ўқувчилар томонидан бир йил foundation курси, яъни ўша бошланғич тайёргарлик бўйича ўқишга мажбур бўлишяпти ва бу бизнинг фарзандларимиз бир йил йўқотишига олиб келяпти.

Агарда биз 12 йиллик таълимни қонунчиликка киритадиган бўлсак, бунда бизда бир қатор давлатларда, яъни foundation ўқишга мажбур бўлишмайди ва тўғридан-тўғри ўша бакалавр даражасига кирганда ўқиш имконияти яратилади”, – деди Сардор Ражабов.

Эслатиб ўтамиз, 2019 йилда 9 йиллик таълим тизими тугатилиб, 11 йиллик таълим тизимига қайта ўтилганидан кейин 279 минг нафар ўқувчилар 11-синфни тамомлаганди.

• Мактаб
• Maktabgacha ta'lim vazirligi
• Қарор
• Taqdimot
• Янгилик