NDTV хабарига кўра, Непал бўйлаб уюштирилаётган норозилик намойишлари вақтида тахминан 25 та қамоқхонадан 15 мингдан ортиқ маҳбус қочиб кетган.

Мамлакатнинг ғарбий Каилали провинцияси пойтахти Дҳангадҳида қамоқдан қочган 692 нафар маҳбусдан бири эртаси куни ўз ихтиёри билан таслим бўлган. У ҳокимиятга навбатдаги ҳукумат келгач, яна қамоққа олиниб, жазоси икки баробар ошишидан қўрққанини билдирган. Ушбу қамоқхонада намойишлар бошланишидан олдин 697 нафар маҳбус бўлган. Тартибсизликлардан сўнг эса фақатгина 5 нафари қолган.

Таслим бўлган маҳбус 2 нафар оила аъзоси билан бирга қамоқхона эшигига келиб, қўлида қуроли бор ходимларга юзланиб, таслим бўлишини айтган. Ходимлар дастлаб маҳбусни эшитишмаган, аммо сўнгра уни ичкарига олишга розилик билдирилган. Мамлакатда намойишлар бошланганидан бери камида 8 нафар маҳбус хавфсизлик ходимлари билан бўлган тўқнашувларда ҳалок бўлган. Қочиш вақтида қамоқхона бинолари ёқиб юборилган, дарвозалар бузиб ташланган.

Мамлакатда сўнгги кунларда аҳолининг ёш қатлами иштирокида ҳукуматга қарши норозилик намойишлари уюштирилмоқда. Улар ҳукуматнинг бир неча ижтимоий тармоқларни тақиқлашига ҳамда коррупцияга қарши норозилик билдирмоқда. Шу сабаб бош вазир КП Шарма Оли 9 сентябрь куни истеъфо беришга мажбур бўлган.

Непал армияси 11 сентябрь куни тахминан 200 нафар маҳбусни яна қўлга олган, бироқ минглаб қочқинлар ҳали ҳам озодликда юрибди. Тинчлик ўрнатиш учун армияга ва полицияга катта қийинчиликлар туғилмоқда. Бундан ташқари, “З авлод инқилоби” деб ном олган норозилик намойишларида Hilton меҳмонхонаси бутунлай ёқиб юборилган.

• Намойиш
• Непал