Ижтимоий тармоқларда Қорақалпоғистон Республикаси Нукус шаҳрида 2 нафар ёш боланинг ўткир заҳарлангани, улардан бирининг вафот этгани ҳақида хабарлар тарқалди. Дастлабки маълумотларда, уларнинг тез тайёрланувчи лапшадан заҳарлангани айтилган эди.

Бироқ санитария-эпидемиологик осойишталик ва жамоат саломатлиги хизмати уларнинг лапшадан заҳарлангани ҳақидаги маълумотларни рад этди ва қуйидагиларни маълум қилди:

Жорий йилнинг 25 январь куни бемор Б.Б.нинг оғзаки кўрсатмасига кўра, тушликда укаси М.А. билан бирга уйига яқин жойдаги озиқ-овқат дўконидан тез тайёрланадиган лапша маҳсулотини сотиб олиб, тайёрлаб истеъмол қилишган. Лапша маҳсулотини тайёрлаш жараёнида маҳсулотда айниш белгилари, ўзга ёт ҳид ва таъм сезилмаган.

Ўша куни 17:00-18:00 ларда Б.Б. уйида 1-1,5 йилдан буён сақланиб турган, номи ва ишлаб чиқарувчиси ҳамда сотиб олган жойи номаълум 500 гр.га яқин целлофан пакетда сақланиб турган, кукун кўринишидаги кемирувчиларга қарши дори билан уй атрофи, ошхона ва битта хонага сепиб чиққан. Кемирувчиларга қарши дорини сепиш вақти ва сепганидан сўнг хоналарда ўткир ҳид сезилган.

2023 йил 26 январь куни соат М.А. 7:00-8:00 ларда, Б.Б соат 9:30-10:00 ларда қайт қила бошлаган. Белгилар ўтиб кетмагандан сўнг тушлик вақтида тез ёрдам чақирилган. Лекин ота-онаси томонидан уйда даволаниш маъқул кўрилган. М.А. ва Б.Б. қайт қилишга қарши дорилар қабул қилишган. Ўша куни тунги соат 23:00-24:00лар атрофида М.А. ва Б.Б.лар такрорий қайт қила бошлашган. 27 январь куни соат 6:00-7:00ларда «Тез ёрдам» чақириб, Республика болалар юқумли касалликлар шифохонасига юборилган. Лекин беморларнинг касаллик белгилари юқумли касалликлардан бўлмаганлиги сабабли Республика шошилинч тез тиббий ёрдам илмий маркази Қорақалпоғистон филиалига юборилади.

Шифокорлар томонидан беморларга «Фосфорорганик бирикмалардан ўткир заҳарланишнинг оғир ва ўрта оғир даражаси» бирламчи ташхиси қўйилган.

М.А. келгандаги аҳволи оғир ҳолатда, реанимацион чора-тадбирлар олиб борилишига қарамасдан беморда 27 январь соат 09:24 да биологик ўлим қайд этилди. Фуқаро Б.Б нинг аҳволи қониқарли бўлиб, ҳолат шифокорлар назоратига олинган.

Юқоридаги ҳолат бўйича такрорий мурожаатлар бўлмаган ва профилактик ишлар давом эттирилмоқда.

• Нукус
• Қорақалпоғистон
• хабар