Колумбиянинг Богота шаҳрида жаҳон чемпионатининг сўнгги кунида оғир атлетикачилар энг оғир вазн тоифаси +109 килограммда совринли ўринлар учун мусобақаларда қатнашди.

Дастлаб чемпионатнинг «C» ва»Б» гуруҳларида иштирок этаётган спортчилар, ундан кейин «А» гуруҳидан жой олган жаҳон оғир атлетикасининг етакчи вакилларининг тақдимоти бўлиб ўтди.

Мусобақанинг «А» гуруҳидан жой олган Токио олимпиадаси ғолиби, жаҳон чемпиони ва рекордчиси Акбар Жўраев баҳслар олдидан ўтган тақдимот маросимида иштирок этди.

Сўнг чемпионатнинг расмий баҳсларига қатнашиш учун белгиланган машғулот майдонида машқларни бажаришга киришди.

Қайд этилишича, жаҳон чемпионати супасига чиқишга тайёргарлик кўриш майдончасида Акбар Жўраев кичик техник жароҳатга чалинган.

Оқибатда жаҳон чемпионати ташкилий қўмитасининг шифокорлар комиссияси ва терма жамоа шифокори хулосасига биноан ҳамюртимизга расмий баҳсларда қатнашишга рухсат берилмаган.

Акбар Жўраевнинг ўтган йилги Токио олимпиадаси ва Тошкентда ўтган жаҳон чемпионатларида олган жароҳатлари техник жароҳатни келтириб чиқарган.

Жўраев жаҳон чемпионати медаллари учун курашга кириша олмаган бўлсада тақдимот маросимида қатнашиши ўз навбатида Париж-2024 учун маълум талабни бажаришини таъминлади.

Боиси, Халқаро оғир атлетика федерацияси томонидан тасдиқлаган талабга кўра, Париж-2024га номзод спортчи олимпия циклидаги бешта мусобақада қатнашиши талаб этилади.

Шу тариқа, Ўзбекистон терма жамоаси аъзолари мазкур жаҳон чемпионатини 3 та олтин (Руслан Нурудинов), 1 та кумуш ва 1 та бронза (Турсуной Жабборова) медаллари ва Париж-2024 Олимпиадасининг зарур рейтинг очколарини қўлга киритган ҳолда якунлади.

109+ кг. вазн тоифасидаги баҳсларда эса қуйидаги спортчиларга медаллар насиб этди:

1. Лаша Талахадзе (Грузия) — 466 (215+251)

2. Гор Миносян (Баҳрайн) — 462 (215+250)

3. Вараздат Лалаян (Арманистон) — 461 (215+246)

• Жаҳон чемпионати
• Оғир атлетика
• Ўзбекистон