Онкологик касалликка чалинган беморлар ҳам коронавирусга қарши эмланиши мумкинми? Бу ҳақда шифокор Эъзозбек Ризаев маълумот берди.

"Маълумки, COVID-19 инфекцияси онкологик касалликка чалинган беморларда жуда оғир ўтади. Шу боис, Жаҳон соғлиқни сақлаш ташкилоти томонидан онкологик хасталиклар билан оғриётган беморларни коронавирус инфекциясига қарши эмлаш зарур эканлиги белгиланган.

Бироқ, бунда тиббий муолажалар турига эътибор қаратиш лозим. Агар беморда кимё ёки нур терапияси курси ўтказиладиган бўлса, у мазкур муолажадан аввал эмланиши зарур. Боиси, бундай тиббий муолажалар инсон организмида иммун тизимининг кучсизланишига олиб келади. Натижада бемор вакцина олганида танада коронавирус инфекциясига қарши жавоб реакцияси – антитаначалар ишлаб чиқарилиш даражаси паст бўлади.

Демак, онкологик касалликларга чалинган беморлар COVID-19 ни енгилроқ ўтказиш учун ҳам эмланишлари зарур", – дейди шифокор.

• Вакцина
• коронавирус