Ўзбекистонда коронавирусни зарарсизлантирадиган ноёб маҳсулот – иммун сути сотувга чиқарилди. Бу ҳақда Ўзбекистон Олий таълим, фан ва инновациялар вазирлиги матбуот хизмати хабар берди.

“Қорақалпоғистон пойтахти Нукус шаҳрида фаолият юритувчи “PanaevFarms” SARS-CoV-2'ни зарарсизлантириш хусусиятига эга бўлган иммун сут ва сут маҳсулотларини ишлаб чиқариш ва сотишни йўлга қўйди”, – дейилади хабарда.

Коронавирусга қарши иммунитетли сут олиш лойиҳаси устида иш 2021 йилда Инновацион ривожланиш вазирлиги ҳузуридаги Халқаро молекуляр аллергология маркази ва Вена тиббиёт университети томонидан бошланган эди. Тажриба тариқасида “PanaevFarms”  томонидан Австрия ва Германиядан келтирилган наслдор сигирлар ва голштеин сигирларига Ўзбекистон-Хитой ZF-UZ-VAC2001 вакцинасининг 3 дозаси юборилди.

2022 йилда  ZF-UZ-VAC2001 рекомбинант вакцинаси билан эмланган сигирларнинг иммун сутидан олинган таҳлил натижалари иккинчи дозадан икки ҳафта ўтиб нейтраллаштирувчи антикорлар ишлаб чиқилганлигини кўрсатди.

2022 йил октябрь ойидан "PanayevFarms"да Иммуне Милк савдо белгиси остида пастеризацияланган сутни кичик ҳажмда ишлаб чиқариш технологик линияларини синовдан ўтказиш бошланди.

“Frontiers in Nutrition” нуфузли илмий журналида коронавирус инфекциясига қарши иммунитетли сутнинг янги авлоди натижалари ҳақидаги илмий мақола чоп этилди.

Мутахассисларнинг фикрича, маҳсулотни ишлаб чиқариш, айниқса, ЖССТ Eris omicron штаммининг янги варианти дунёда тез тарқалишини эълон қилган шароитда муҳим аҳамиятга эга.

• коронавирус