2021 йил 25 ноябрь куни Олий Мажлис Қонунчилик палатасининг Саноат, қурилиш ва савдо масалалари қўмитаси томонидан Ўзбекистон Республикаси Транспорт вазирлиги ҳузуридаги Автомобиль йўллари қўмитаси раиси ўринбосари Жамшид Турсуновнинг «Таъмирталаб кўприкларни таъмирлаш ишларининг амалга оширилган ҳолати тўғрисида»ги ахбороти эшитилди.

Қайд этилишича, Ўзбекистонда йўл-транспорт соҳасида сўнгги беш йил давомида 653 та йирик кўприк ва йўл ўтказгичларнинг қурилиб, 907 та кўприк ва йўл ўтказгичларнинг реконструкция қилинган ва таъмирланган.

2021 йил 1 март ҳолатига республикада 14 755 та кўприк иншоотлари мавжудлиги, шундан 3 324 таси кўприк иншоотлари идоравий мансуб ташкилотларга бириктирилмаганлиги, 1 009 таси кўприк иншоотлари авария олди ва авария ҳолатида эканлиги, 5 930 таси кўприк иншоотлари таъмирталаб аҳволдалиги аниқланган.

Таъкидланишича, амалдаги дастурларга мувофиқ жорий йилда 37 та умумий фойдаланишдаги автомобиль йўлларидаги кўприк иншоотларида қуриш ва реконструкция қилиш ишлари, 107 та умумий фойдаланишдаги автомобиль йўлларидаги кўприк иншоотларида капитал ва жорий таъмирлаш ишлари, 71 та шаҳар кўчалари ва ички йўллардаги кўприк иншоотларида қуриш ва реконструкция қилиш ишлари, 113 та шаҳар кўчалари ва ички йўллардаги кўприк иншоотларида капитал ва жорий таъмирлаш ишлари амалга оширилмоқда.

Шунингдек, бугунги кунда кўприк иншоотларини жорий таъмирлаш ишлари бўйича 10 дан ортиқ меъёрий ҳужжатлар ишлаб чиқилиб, амалиётда қўлланила бошланган.

Эшитувда келтирилишича, бугунги кунда кўприк ва йўл ўтказгичлар қурилиши соҳасида янги технологиялар, жумладан кўприкнинг оралиқ қурилмасини монолит бетондан барпо этиш технологияси қўлланилмоқда.

Ушбу технологиянинг афзаллиги кўприк оралиқ қурилмаларини завод шароитида йиғма темир-бетондан тайёрлашнинг олди олиниб, ортиқча завод харажатлари ва транспорт харажатларининг тежалишига олиб келади.

• Кўприк
• Олий Мажлис