Европа Иттифоқи Россиянинг Украинага қарши уруши сабаб мамлакатга навбатдаги – 20-санкциялар пакетини ишлаб чиқишга киришди. Бу масала Литва Молия вазири Криступас Вайтекунас ва Европа комиссиясининг молиявий хизматлар ҳамда Жамғарма-инвестиция иттифоқи бўйича комиссари Мария Луиш Албукерке ўртасида муҳокама қилингани ҳақида Литва Молия вазирлиги маълум қилди.

Вайтекунасга кўра, Европа Иттифоқи босимни фақат Россияга эмас, балки Беларусга ҳам кучайтириши лозим, чунки у “доимий гибрид ҳужумлар”ни амалга оширмоқда.

“Қувонарлиси, октябрь ойи якунида ЕИ даражасида 19-санкциялар пакети келишиб олинди. Лекин, айниқса Россиянинг энергетика ва молия секторларига нисбатан босимни янада кучайтириш лозим. Шу сабабдан биз навбатдаги санкциялар бўйича жиддий муҳокамаларни бошлашимиз керак”, – деган Литва вазири.

Унинг таъкидлашича, Европа Иттифоқи Беларусга нисбатан чораларни қаттиқлаштириб, уларни Россияга нисбатан амал қилаётган санкциялар даражасига олиб чиқиши ва қўшимча чекловлар жорий этиши керак. Албукеркенинг сўзларига кўра, Минскка нисбатан янги чораларни тайёрлаш жараёни ҳали дастлабки босқичда.

“Биз учинчи давлатлар билан ҳамкорлик қиляпмиз, чунки улар орасида санкцияларни айланиб ўтишга ёрдам берувчи мамлакатлар ҳам бор”, – деган Европа комиссари.

Маълумот учун, ЕИ сўнгги, 19-санкциялар пакетини 23 октябрда тасдиқлаган эди.

• Россия
• Санкция
• Yevropa Ittifoqi