Экология, атроф-муҳитни муҳофаза қилиш ва иқлим ўзгариши вазирлиги томонидан республикада ноябрь ойи “Браконерликка қарши курашиш” ойи деб белгиланди.

Мақсад — Ўзбекистон Республикасининг “Экологик назорат тўғрисида”, “Табиатни муҳофаза қилиш тўғрисида” ва “Ҳайвонот дунёсини муҳофаза қилиш ва ундан фойдаланиш тўғрисида”ги қонунлари ижросини таъминлаш, браконерликка қарши қатъий чоралар кўришдир.

Ой давомида барча муҳофаза этиладиган табиий ҳудудларда, шунингдек, республиканинг чўл, тоғли ҳудудларида ҳамда табиий сув ҳавзаларида ноқонуний равишда ўсимлик ва ҳайвонот дунёсидан фойдаланиш, жумладан, ноқонуний балиқ овлаш бўйича тегишли ташкилотлар билан ҳамкорликда экологик назорат тартибида рейд тадбирлари амалга оширилади.

Шунингдек, ҳар бир ҳудудда рейд тадбирлари ўтказиш бўйича тезкор гуруҳлар шакллантирилиб, ҳайвонот ва ўсимлик дунёси объектларидан фойдаланиш, ов қилиш ва балиқ овлаш қоидаларига риоя этилиши бўйича тарғибот ва профилактика ишлари олиб борилади.

“Агар браконерлик ҳолатларига гувоҳ бўлсангиз, бу ҳақда Экология вазирлигининг (71) 207-11-07, (71) 207-11-08 телефон рақамлари, 1157, 1207 қисқа рақамлари ёки @эcоговуз_бот орқали хабар беринг”, – дейилади вазирлик хабарида.

• Экология
• Қарор
• Вазирлик