Аргентиналик футболчи Лионел Месси 2026-йилги Жаҳон чемпионати олдидан спорт формасини сақлаб туриш мақсадида вақтинча фаолиятини Туркия чемпионатида давом эттириши мумкин. Турк нашри Fotomac'га кўра, ҳужумчи 4 ойлик шартнома асосида “Галатасарой”га ўтиши мумкин. Манбада ёзилишича, клуб Месси билан қисқа муддатли шартнома имзолашга тайёр ва уни имкон қадар тезроқ жамоага қўшиб олишни истамоқда.

“Галатасарoй” ёзда Виктор Осимҳен, Лерой Сане ва Илкай Гюндўған каби футболчилар билан шартнома имзолади. Ҳозирда истанбулликлар Туркия чемпионатида 29 очко билан етакчилик қилмоқда. Агар Месси ҳам қўшилса, клубнинг ҳужум чизиғи янада кучайиши ҳамда у бир неча ой давомида юқори спорт формасини сақлаб турган ҳолда Жаҳон чемпионатига тайёргарлик кўриши мумкинлиги тахмин қилинмоқда.

“Интер Майами” узоқ вақтдан бери чемпионатдаги танаффус пайтида Мессини бошқа клубга ижарага бериш имкониятини кўриб чиқмоқда. Аввалига клуб раҳбарияти Саудия Арабистонидаги жамоалардан бирига мурожаат қилган, аммо мамлакат спорт бошқармаси бу таклифни қатъиян рад этган ва миллий чемпионатни машғулот масканига айлантирмаслигини билдирган.

Маълумот учун, 2026-йилги Жаҳон чемпионати 11 июндан 19 июлгача АҚШ, Канада ва Мексика яшил майдонларида бўлиб ўтади.

• Футбол
• Месси
• Туркия
• chempionat
• shartnoma