Ўзбекистон-Германия ўртасидаги савдо-иқтисодий алоқаларни мустаҳкамлаш, ўзаро товар айланмасини ошириш ҳамда Европа компаниялари билан ҳамкорликни йўлга қўйиш мақсадида 2022 йил 20-24 июнь кунлари Германиянинг Дюссельдорф шаҳрида бўлиб ўтадиган Европанинг энг нуфузли “Wire and Tube Fair 2022” халқаро кўргазмасида Ўзбекистоннинг электротехника саноати 10 га яқин корхоналари илк маротаба марказлашган кўргазма стенди билан иштирок этади.

Ушбу кўргазма кабель сим йўналишида нафақат Европадаги балки дунёдаги энг нуфузли кўргзама ҳисобланиб, 1986 йилдан бери ташкил этиб келинмоқда. Жорий йилда кўргазмага 1800 дан ортиқ компаниялар иштироки кутилмоқда.

Кўргазма доирасида нафақат иштирок этиш, балки Германиянинг нуфузли компаниялари билан инвестиция ва экспорт имкониятларини кенгайтириш мақсадида бир қатор сессиялар ва Б2Б учрашувлар ўтказиш ҳам кўзда тутилган. Бу билан Европанинг қатор компанияларини Ўзбекистонга кенгроқ жалб этиш ва ушбу мамлакатга экспорт шартномаларини кўпайтириш бўйича аниқ таклифлар ишлаб чиқилади.

Такидланишича, 2021 йилда “GSP+” тизими доирасида 6 минг 200 турдаги маҳсулотларни Европа Иттифоқига божсиз экспорт қилиш имконияти яратилди. Бу, ўз навбатида, электротехника саноати корхоналарининг Европа бозорларига ҳам ҳеч қандай тўсиқларсиз, эркин кириб боришини кафолатлайди. Мазкур кўргазманинг Ўзбекистон электротехника саноати корхоналари учун Европа бозорларига кириш имкониятини бериши кутилмоқда.

Маълумот учун, Европа кабель бозорининг йиллик ҳажми 55 млрд доллар (2021 йил) бўлиб, жаҳон кабель бозорининг 38 фоизини ташкил этади.

Эслатиб ўтамиз, Президент Шавкат Мирзиёев 13 июнь куни стандартлаштириш ва сертификатлаштириш соҳасидаги самарадорликни ошириш масалаларига бағишлаб ўтказилган йиғилишида йил якунигача саноат соҳалари 27 та халқаро кўргазмаларда иштирок этиб, Европа бозорларига кириб боришларини таъминлаш юзасидан тегишли кўрсатма ва топшириқлар берган эди.

• Германия
• Кўргазма
• Ўзбекистон
• Халқаро
• Европа