Украина ATACMS билан Курск-Восточний аэродроми ва С-400 зенит-ракета дивизионига зарба берган, буни Россия Мудофаа вазирлиги тасдиқлади.

ATACMS узоқ масофали баллистик ракетаси Курскдан 7 километрлик масофада жойлашган Курск-Восточний аэродромига келиб урилган. Бу ҳақда Россия Мудофаа вазирлиги 26 ноябрь куни эълон қилинган баёнотида маълум қилди. Украина 3 кун ичида узоқ масофали ракеталар билан Курск областига икки маротаба зарба берган.

25 ноябрь куни Курск-Восточний аэродромига саккизта ATACMS ракеталари томонидан зарба берилган, шулардан еттитаси ҳаво мудофаа тизими томонидан уриб туширилган бўлса, биттаси нишонга теккан.

Аввалроқ, 23 ноябрь куни Украина Қуролли кучлари Курскдан 37 км шимоли-ғарбда жойлашган Лотаревка ҳудудига бешта ATACMS ракетаси билан зарба берган. Шулардан иккитаси нишонларга етган, радар станцияси шикастланган, ходимлар орасида қурбонлар борлиги айтилган эди.

“Жавоб чоралари тайёрланмоқда”, – дея маълум қилган Россия Мудофаа вазирлиги.

• Россия
• Украина