БМТнинг Озиқ-овқат ва қишлоқ хўжалиги ташкилоти (FAO) маълумотига кўра, дунёда озиқ-овқат маҳсулотлари нархи кетма-кет уч ой давомида ошиб бормоқда. Апрель ойида FAO озиқ-овқат нархлари индекси 130,7 пунктни ташкил этиб, март ойига нисбатан 1,6 фоизга, ўтган йилнинг шу даврига нисбатан эса 2 фоизга юқорилаган.

Нархларнинг ошишига об-ҳаво билан боғлиқ хатарлар, энергия ресурслари қимматлашуви ва логистика тизимидаги узилишлар асосий сабаб сифатида кўрсатилмоқда.

Жаҳон бозорида буғдой ва маккажўхори нархлари ҳам ўсди. АҚШ ва Австралиядаги қурғоқчилик хавфи, Бразилиядаги об-ҳаво муаммолари ҳамда ўғит нархларининг ошиши бозордаги босимни кучайтирган.

Шунингдек, ўсимлик мойлари нархи 2022 йил июлидан буён энг юқори даражага етди. Палма, соя, кунгабоқар ва рапс мойлари қимматлашган. Бунга биоёқилғи саноатидаги талаб ортиши ва Жануби-Шарқий Осиёда ишлаб чиқариш қисқариши мумкинлиги ҳақидаги хавотирлар сабаб бўлмоқда.

Гўшт нархлари ҳам рекорд даражага чиқди. Айниқса, мол гўшти нархи тарихий максимумни янгилаган. Сут маҳсулотлари нархида эса бироз пасайиш кузатилган.

Шакар нархи аксинча, бир ойда 4,7 фоизга арзонлаган. Мутахассислар бунга Хитой, Тайланд ва Бразилияда ишлаб чиқариш ҳажми ошиб бораётгани сабаб бўлаётганини таъкидламоқда.