Андижон вилоятининг Андижон туманида жойлашган ёғоч омборида йирик ёнғин юз берди. Бу ҳақда вилоят Фавқулодда вазиятлар бошқармаси маълум қилди. Қайд этилишича, ҳодиса 21 июнь куни соат 20:10 да туманнинг “Мард” МФЙ ҳудудида содир бўлган. Ёнғин ҳақида хабар келиб тушгач, воқеа жойига зудлик билан ёнғин-қутқарув экипажлари жалб этилган.

Қутқарувчиларнинг тезкор саъй-ҳаракатлари натижасида ёнғин соат 21:55 да тўлиқ бартараф этилди. Дастлабки маълумотларга кўра, ҳодиса оқибатида тан жароҳати олганлар қайд этилмаган. Ҳозирда ёнғиннинг келиб чиқиш сабаблари ва етказилган моддий зарар миқдори аниқланмоқда.