Австралия Федерал полицияси (АФП) Сидней шаҳри ғарбидаги Лондердерри ҳудудида 2,7 тонна кокаинни мусодара қилди. Бу мамлакат тарихида аниқланган энг йирик кокаин партияси сифатида қайд этилди. Бу ҳақда AFP матбуот хизмати маълум қилди. Маълум қилинишича, гиёҳванд модда учта юк контейнерининг сохта поллари остига яширилган пластик идишлар ичидан топилган. Полиция ҳисоб-китобларига кўра, мусодара қилинган кокаиннинг қора бозордаги қиймати қарийб 816 миллион АҚШ долларини ташкил этади. Ушбу миқдор тахминан 3 миллион бир марталик дозага тенг.

Мазкур иш доирасида 21 ва 25 ёшли икки эркак қўлга олинган. Уларга ноқонуний равишда мамлакатга олиб кирилган гиёҳвандлик воситаларининг тижорий партиясини сақлаш айблови қўйилган. Ушбу жиноят учун максимал жазо сифатида умрбод озодликдан маҳрум этиш назарда тутилган. Ҳозирда ҳар икки гумонланувчи қамоқда сақланмоқда. Навбатдаги суд мажлиси жорий йилнинг 13 август куни Пенрит судида бўлиб ўтиши режалаштирилган. Қайд этилишича, мусодара операцияси Австралиянинг шарқий қирғоқлари орқали йирик миқдордаги гиёҳванд моддаларни олиб кириш ва тарқатишга уринишларни фош этишга қаратилган “Оператион Minjiang” махсус тергови доирасида амалга оширилган.

Тергов маълумотларига кўра, кокаин мамлакатга Шимолий Квинсленддаги Мидж-Пойнт ҳудуди орқали олиб кирилган ва кейинчалик уюшган жиноий гуруҳ кўрсатмасига асосан Сиднейга етказилган. “Оператион Minjiang” доирасида ҳуқуқни муҳофаза қилувчи органлар шу пайтгача жами 3 тоннадан ортиқ гиёҳвандлик воситаларини, жумладан, аввал мусодара қилинган 178 килограмм кокаин ҳамда 142 килограмм метамфетаминни қўлга киритган.