Кеча, 26 июль куни Парижда XXXIII ёзги Олимпия ўйинларининг тантанали очилиш маросими бўлиб ўтди. Тарихда биринчи марта у стадионда эмас, балки сувда - Сена дарёсида ўтказилди. Анъанавий миллий қайиқ парадида 206 давлатдан 10 мингдан ортиқ спортчи иштирок этди.

Анъанага кўра, биринчи бўлиб ўйинлар асосчиси - Греция жамоаси сузиб ўтди. Унинг ортидан - қочқинлар жамоаси. Кейин делегациялар алифбо тартибида пайдо бўлди. Қайиқлар маршрути тахминан 6 км бўлди ва якуний шоу Трокадеро майдонида бўлиб ўтди.

Олимпиада машъаласини дзюдочи Тедди Ринер ва енгил атлетикачи Мари-Жозе Перек ёқди – машъала билан шар Франция пойтахти осмонига кўтарилди. Бу 1783 йил воқеаларига ишора - ўша пайтда французлар Жозеф-Мишел ва Жак-Этенн Монголфе томонидан ихтиро қилинган ҳаво шарида биринчи парвоз содир бўлган.

Ташкилотчиларга кўра, очилиш маросимини 320 мингга яқин киши, жумладан, 100 га яқин давлат ва ҳукумат раҳбарлари томоша қилган. Тўрт соатга яқин давом этган шоуда 3000 га яқин актёр ва раққослар иштирок этди.

Шунингдек, Сена дарёсидан бир гуруҳ спортчиларимиз ва Ўзбекистон делегацияси байроқдорлари Абдумалик Халоков ва Зайнаб Дайибекова юртимиз байроғини мағрур ҳилпиратиб ўтишди.

• Делегация
• Fransiya
• Олимпиада
• Parij
• Спорт