Атоқли давлат ва жамоат арбоби Дамир Салихович Ядгаров бугун, 4 июль куни узоқ давом этган хасталикдан сўнг 88 ёшида вафот этди.

''Дамир Ядгаров 1937 йил 18 февралда Шофиркон туманида туғилди. Ўрта мактабни тугатиб, 1960 йилда Тошкент қишлоқ хўжалиги институтини муваффақиятли тамомлади.

Меҳнат фаолиятини Тошкент қишлоқ хўжалиги институти ёшлар қўмитасининг котиблиги лавозимидан бошлаб, узоқ йиллар Ёшлар ташкилоти ҳамда қишлоқ ва сув хўжалиги тизимидаги масъул вазифаларда ишлади.

Қаерда ишламасин, Дамир Ядгаров фаолияти давомида аввало, ўзига талабчан ходим, куйинчак раҳбар сифатидаги фазилатларини намоён этди.

Бу жиҳат унинг Бухоро вилояти ҳокими сифатида ишлаган 1992-1994 йилларда янада яққол кўзга ташланди. Айнан ғоятда мураккаб кечган шу йилларда Дамир Ядгаров ҳудудда ижтимоий барқарорликни таъминлаш, аҳоли турмуш даражасини яхшилаш, бозор иқтисодиётига асосланган янги тартибларни жорий этиш, ҳудудда хусусий секторни жадал ривожлантириш борасида жонбозлик кўрсатди.

Дамир Салихович Ядгаров қарийб 50 йиллик меҳнат фаолияти давомида ўзининг улкан раҳбарлик салоҳияти, бой билим ва тажрибаси, маънавий фазилатлари, Ватанимизга беқиёс муҳаббати ва садоқати билан ҳақли равишда халқимизнинг қалбидан чуқур жой олган улуғ инсон эди.

Шу боис вилоят аҳли ҳамда жамоатчилик Дамир Ядгаровнинг Бухоро ва бухороликлар учун қилган хизматларини ҳамиша миннатдорлик билан хотирлайди.

Унинг бевосита раҳбарлигида вилоятда селекция ва уруғчилик соҳасини илмий ривожлантириш борасида улкан ишлар амалга оширилди.

Хусусан, Ўзбекистон пахтачилик илмий-тадқиқот институти Бухоро филиали директори сифатидаги меҳнат фаолияти йилларида пахтанинг Зарафшон воҳасига мос 10 га яқин иқтисодий самарадор навлари кашф этилди. Қаттиққўл раҳбар ва меҳрибон устоз сифатида ўнлаб шогирдларни тарбиялади.

Дамир Ядгаровнинг ҳудудни ривожлантириш борасидаги хизматлари давлатимиз томонидан муносиб тақдирланиб, у “Ўзбекистон Республикасида хизмат кўрсатган қишлоқ хўжалик ходими” унвони, “Меҳнат шуҳрати” ордени билан мукофотланган эди.

Ушбу мусибатли кунда марҳумнинг барча оила аъзолари ва яқинларига чуқур таъзия билдириб, Яратгандан уларга сабр-тоқат тилаймиз'' - дейилади вилоят ҳокимлигининг расмий хабарида.

• Бухоро
• Давлат хизматчиси
• Меҳнат
• Орден
• Пахта
• илм-фан