Шавкат Мирзиёев 16-март куни Давлат солиқ қўмитасининг Маълумотларни қайта ишлаш марказини бориб кўрди. Бу ҳақда Президент матбуот хизмати хабар берди.

Қайд этилишича, мамлакатда аҳоли ва бизнес учун қулайликларни ошириш, инсон аралашувини камайтириш мақсадида солиқ органлари фаолияти изчил рақамлаштирилмоқда. Хусусан, ушбу марказ Ўзбекистон Республикаси Президентининг 2020 йил 30 октябрдаги фармонига мувофиқ, тўлиқ янгиланган. Давлат бюджетидан ажратилган 100 миллиард сўм эвазига бинолар таъмирланиб, узлуксиз электр таъминоти қурилмалари, пресизион кондиционерлар, катта ҳажмли сервер ва компютерлар билан жиҳозланган.

Натижада марказ қуввати 8 мартага ошди, электрон хизматлар кўлами кенгайди. Шахсий карточкаларда салдо қаторларини ҳисоблаш каби мураккаб жараёнлар 10 баробар тезлашган. Масалан, илгари республика бўйича ҳисоблашга 24 соат кетган бўлса, эндиликда бу жараён 2-3 соатда амалга оширилмоқда. Бу яширин иқтисодиётни қисқартиришда муҳим омил бўлмоқда.

Қайд этилишича, киберҳужумдан ҳимоя, бизнес-аналитика технологиялари жорий қилинган. Хусусан, “э-ижара”, “э-имтиёз”, “Қўшилган қиймат солиғи тўловчилари”, “Солиқ текширувлари”, “Автоматлаштирилган камерал назорат тизими”, “Солиқ узилиши коеффисиенти” каби янги дастурий маҳсулотлар ишлаб чиқилган.

Бу марказни мамлакат солиқ тизимининг “мияси” дейиш мумкин. Бу ерга барча солиқ тўловчиларнинг маълумотлари интеграция қилинган. 50 нафарга  яқин малакали мутахассис солиқ айланмасини онлайн режимда кузатиб, масофадан тезкор хизмат кўрсатади. 

Шунингек, давлат раҳбари марказдаги иш жараёнини кўздан кечирган. Солиқ органлари фаолияти самарадорлигини ошириш бўйича топшириқлар берган.

• ДСҚ
• Президент
• Шавкат Мирзиёев
• Ташриф