Ижтимоий ҳимоя миллий агентлиги Тошкент шаҳридаги дўконлардан бирида онаси томонидан калтакланган қиз ҳолати бўйича расмий муносабати билдирди.

Маълум бўлишича, 22 ноябрь куни ижтимоий тармоқларда Тошкент вилояти, Нурафшон шаҳрида рўйхатда турувчи муқаддам судланган фуқаро В.А. Мирзо Улуғбек туманида жойлашган гул дўконларидан бирига вояга етмаган фарзанди В.И кириб гул сўраган вақтида маст ҳолатда қизини орқасидан кириб, ҳақоратлаб, уни уришиб, дўкондан олиб чиқаётганлиги акс этган видео материал тарқалди.

Ижтимоий ҳимоя миллий агентлиги томонидан ҳолат юзасидан тегишли ўрганишлар олиб бориш мақсадида шу куннинг ўзидаёқ ишчи гуруҳ тузилди.
Ўрганишлар давомида В.А. турмуш ўртоғи билан бирга яшамаслиги, доимий равишда спиртли ичимлик истеъмол қилиши, доимий иш жойига эга бўлмаганлиги сабабли кўп қаватли уйлардаги хонадонларнинг эгалари билан келишиб, уй йўлакларини тозалаб кунлик даромад топиши аниқланган.

Ҳозирги кунда фуқаро В.А Тошкент шаҳар аёлларни реабилитация ва мослаштириш марказига жойлаштирилгани маълум қилинди. Вояга етмаган В.И Тошкент шаҳар Вояга етмаганларга ижтимоий-ҳуқуқий ёрдам кўрсатиш марказига жойлаштирилиб, психолог ва педагоглар томонидан унинг руҳий ҳолатини яхшилаш юзасидан ишлар амалга оширила бошланган.

Агентликнинг қўшимча қилишича, она ва болага ёрдам кўрсатиш мақсадида "Инсон" ижтимоий хизматлар марказларининг масъул ходимлари бириктирилиб, мазкур ҳолатнинг келиб чиқиши ва уни бартараф этиш юзасидан комплекс ўрганишлар давом эттирилмоқда.

Олдинроқ мазкур ҳолат Болалар Омбудсмани томонидан назоратга олингани ва Она В.А.нинг ҳаракатларига баҳо бериш юзасидан туман ИИБ томонидан суриштирув ишлари олиб борилаётганини маълум қилгандик.

Шуниндек, қизча Тошкент шаҳар вояга етмаганларга ижтимоий-ҳуқуқий ҳимоя кўрсатиш марказига жойлаштирилиб, онасини ота-оналик ҳуқуқидан маҳрум қилиш масаласи кўриб чиқилаётгани ҳақида хабар берган эдик.

• Болалар
• Ҳуқуқ
• Ижтимоий ҳимоя
• Kaltaklash
• Омбудсман