Қримнинг Украинага қайтарилиши билан мамлакатда тинчлик ўрнатиш мумкин. Бу ҳақда Украина президенти Володимир Зеленский бугун, 26 февраль куни ўзининг Телеграм-каналида жойлаган постида таъкидлаган.

"Қримни қайтариш орқали биз тинчликни тиклаймиз. Бу бизнинг еримиз. Бизнинг халқимиз. Бизнинг тарихимиз. Биз Украинанинг ҳар бир бурчагига Украина байроғини қайтарамиз", — деб ёзди Зеленский.

Маълумот учун, Қрим 2014 йил мартида Украинадаги давлат тўнтариши ортидан ўтказилган референдумдан сўнг Россия ҳудудига айланди. 2014 йилги референдумда Қримдаги сайловчиларнинг 96,77 фоизи, Севастополда эса 95,6 фоизи Россияга қўшилиш тарафдори бўлган.

Украина ҳали ҳам Қримни вақтинча босиб олинган ҳудуд деб билади, кўплаб Ғарб давлатлари бу масалада Киевни қўллаб-қувватламоқда. Ўз навбатида, Россия раҳбарияти Қрим аҳолиси халқаро ҳуқуқ ва БМТ Низомига тўлиқ риоя қилган ҳолда Россия билан демократик тарзда бирлашиш учун овоз берганини бир неча бор таъкидлаган. Россия президенти Владимир Путиннинг сўзларига кўра, Қрим масаласи "ниҳоят ёпилган".

• Qrim
• Россия
• Tinchlik shartnomasi
• Украина