Самарқанд давлат тиббиёт университетида Туркиянинг Истанбул шаҳридаги “Medical Park” тиббиёт маркази мутахассислари билан ҳамкорликда жигар трансплантацияси амалиёти ўтказилди. Бу ҳақда Соғлиқни сақлаш вазирлиги матбуот хизмати маълум қилди.

Қайд этилишича, Қўшработ туманида яшовчи 48 ёшли бемор Саида Нурмуродовага бундан 3 йил аввал жигар церрози ташхиси қўйилган. У шундан сўнг вақти-вақти билан консерватив муолажалар олиб келган. Бироқ даво чоралари кутилган натижа бермагач, ушбу университет клиникаси мутахассисларига мурожаат қилган. Касаллик терминал босқичга ўтгани сабабли уни ҳаётга қайтаришнинг ягона усули сифатида жигар кўчириб ўтказиш амалиёти тавсия этилган.

Тиббий текширувлардан сўнг беморнинг 1977 йилда туғилган укаси Аслиддин Алимов жигарининг бир бўлагини кўчириб ўтказиш учун барча кўрсаткичлар мос келган.

Таъкидланишича, Самарқанд давлат тиббиёт университетида бажарилган операция 8 соат давом этган. Ҳозир бемор ҳамда донорнинг аҳволи яхши. Уларнинг ҳар иккаласи шифокорлар томонидан тиббий назоратга олинган ва керакли тиббий муолажалар давом эттирилмоқда.

“Бундай мураккаб операцияни бажариш учун университетимиз кўп тармоқли клиникасининг Хирургия бўлими юқори технологияли замонавий тиббий асбоб-ускуналар билан жиҳозланди. Қолаверса, “1-сон хирургик касалликлар”, “Анестезиология, реанимасия ва шошилинч тиббиёт” ва “1-ички касалликлар” кафедралари профессор-ўқитувчилари клиниканинг етакчи мутахассислари билан биргаликда Туркиянинг “Medical Park” тиббиёт марказида бир йил давомида малакаларини ошириб қайтди”, – дейди олий ўқув юрти ректори Жасур Ризаев.

Режага кўра, турк мутахассислари билан имзоланган меморандум доирасида мазкур клиникада яқин келажакда йилига 50 га яқин жигар трансплантацияси амалиётини бажариш имконияти яратилади.

• Касаллик
• Самарқанд
• Transplantatsiya