Россия президенти Владимир Путин 2026–2030 йилларга мўлжалланган давлат миграция сиёсатининг янгиланган концепциясини тасдиқлади. Ҳужжат мамлакатнинг расмий ҳуқуқий ахборот порталида эълон қилинган бўлиб, у 2018 йилдан буён амал қилиб келаётган дастурни алмаштиради.

Янги сиёсатга кўра, Россияга меҳнат фаолияти учун келаётган мигрантлар сони 2030 йилгача ўсишда давом этади. Бу иқтисодиётнинг айрим соҳаларида чет эл ишчи кучига бўлган эҳтиёж сақланиб қолаётгани билан изоҳланади. Бироқ ҳукумат миграция жараёнларини қаттиқроқ назорат қилишни мақсад қилган.

Концепцияда Россияга кириш ва чиқиш қоидалари, вақтинчалик яшаш, бошпана ва фуқаролик олиш масалалари аниқ белгилаб берилган. Ҳужжат 9 бўлим ва 46 банддан иборат.

Концепцияда қуйидагилар ҳам таъкидланган:

– Россияга кўчиб келаётган анъанавий қадриятларни қўллаб-қувватлайдиган чет элликлар сони ортиши керак;

– Россияда мактабга қатнамайдиган мигрант болалар сони камайиши лозим;

– Ҳукумат мигрантларнинг ишламайдиган ва ўқимайдиган оила аъзоларининг Россияда яшашини чеклайди;

Россия ҳукумати этник анклавларнинг шаклланиши ва мигрантларнинг жамиятдан четлашишига қарши чоралар кўради;

Россия миграция соҳасидаги давлат назоратини кучайтириш учун ахборот технологиялари ва биометрияни кенг жорий этади.

Россия томони 2030 йилгача ноқонуний мигрантлар сонини кескин камайтириш, хорижий талабалар улушини ошириш ва умумий миграция тизимини рақамлаштириш орқали давлат назоратини кучайтиришни кўзламоқда.

• Oila
• Путин
• Россия
• Сиёсат
• cheklov
• migrant