Сурхондарёда яшовчи фуқаро И.Б.нинг фарзанди ўлими билан боғлиқ видео мурожаати юзасидан вилоят прокуратураси расмий изоҳ берди.

Олтинсой туман ИИБ навбатчилик қисмининг жорий йил 10 августдаги хабарига кўра, соат 08:00 да туман ҳудудидан оқиб ўтувчи “Ҳазарбоғ” канали ирмоғидан Сариосиё тумани Жаннатмакон маҳалласида яшаган (1995 й.т) А.И.нинг жасади топилган.

Республика суд-тиббий экспертиза илмий-амалий маркази Олтинсой туман пунктининг 7 сентябрдаги 22-сонли хулосасида кўрсатилган ички текширув натижаларида мархумнинг ички аъзоларидаги ўзгаришлар нафас етишмовчилиги натижасида вафот этгани ҳақидаги маълумотлар келтирилган бўлса-да, эксперт хулосасининг баёнот қисми билан хулоса қисмида номутаносиб ҳолати кузатилгани сабабли марҳумнинг жасади суд ажрими асосида эксгумация қилиниб (мурдани кўздан кечириш ва экспертиза ўтказиш зарурияти туғилганда уни дафн этилган жойидан қазиб олиш), комиссион суд-тиббиёт экспертизадан ўтказилган.

“2022 йил 12 сентябрдаги 426-сонли ва 14 сентябрдаги 84-қўшимча комиссион суд-тиббий экспертиза хулосаларида, А.И.нинг ўлими юқори нафас йўллари, бурун ва оғиз бўшлиғининг суюқлик билан (сув) беркилиб қолишидан вужудга келган механик асфикция натижасида келиб чиққани, баданида аниқланган шилинмалар ва жароҳатлар хусусияти бўйича унинг ўлимидан сўнг канал бўйлаб оқиши жараёнида нотекис чегараланган юзаки жисмларга урилиши натижасида пайдо бўлгани, унинг баданида қаршилик кўрсатиш, уриш, тепиш, жанжаллашиш натижасида юзага келган тан жароҳатлари аниқланмагани кўрсатилган. Бирламчи хулосада эса ўлим сабаби чўкишнинг нафас йўлларини бурун, оғиз бўшлиғининг суюқлик (сув) билан беркилиши натижасидаги спастикдан (нафас бойламаларининг беркилиб қолиши) вужудга келган механик асфикция оқибатида келиб чиққани ҳолати инобатга олинмагани туфайли тафовут юзага келгани қайд этилган”, – дейилади хабарда.

Шунингдек, А.И.нинг ўлими ҳолати бўйича дастлабки экспертиза текшируви юзасидан хулоса беришда йўл қўйган хато ва камчиликлари учун суд-тиббий эксперт Ў.Бўтаяровга “ҳайфсан” берилган.

Ўтказилган терговга қадар текширув натижасига кўра, марҳумнинг ўлимида бирор-бир шахснинг ҳаракатларида жиноят таркиби аниқланмаганлиги сабабли 17 октябрь куни Ўзбекистон Республикаси ЖПКнинг 83-моддаси 2-бандига асосан жиноят иши қўзғатишни рад қилиш ҳақида қарор қабул қилинган.

• ИИБ
• Kanal
• Прокуратура
• Сурхондарё
• Suvda cho'kish