Ўзбекистоннинг БААдаги Бош консулхонаси авиапарвозлар бекор қилингани сабабли Дубай, Шаржа ва Aбу-Даби шаҳарларидан ватанга қайта олмаётган фуқаролар меҳмонхоналарга жойлашишда ёрдам берди. Бу ҳақда “Дунё” агентлиги хабар қилди.

2 март ҳолатига кўра, Дубайдаги Hyatt Place Dubai меҳмонхонасига жами 93 нафар ўзбекистонлик жойлаштирилди. Уларнинг 61 нафари ушбу меҳмонхонанинг ўзидан чиқариб юборилган фуқаролар бўлиб, вақтинчалик турар жой масаласида қийин аҳволга тушиб қолган эди. 27 нафар фуқаро Floria Hotel меҳмонхонасидан чиқариб юборилган бўлиб, улар ҳам жойлаштирилган. Кўчада қолиб кетган 5 нафар ўзбекистонлик ҳам аниқланиб, хавфсиз жойга кўчирилди. Бундан ташқари, Hampton by Hilton Dubai меҳмонхонасига 39 нафар фуқаро жойлаштирилиб, уларнинг яшаш шароитлари таъминлаган.

Шунингдек, Aбу-Даби шаҳрида оғир ижтимоий аҳволга тушиб қолган 4 нафар фуқаро AG Hotel Abu Dhabi меҳмонхонасига жойлаштирилиб, уларнинг саломатлиги ва хавфсизлиги алоҳида назоратга олинган.

“Ҳозирги вақтда барча фуқароларимизга зарур амалий ва ташкилий ёрдам кўрсатилмоқда. БААдаги Ўзбекистоннинг дипломатик ваколатхоналари ва мутасадди ташкилотлар томонидан вазият доимий равишда мониторинг қилиниб, ҳар бир мурожаат тезкор тарзда кўриб чиқилмоқда”, – дейилади хабарда.

• БАА
• Ўзбекистонлик