Бир неча кун аввал Сенат никоҳланувчи шахслар мажбурий тиббий кўрикдан ўтганларидан сўнг 1 ойлик муддатни кутмасдан исталган вақтда никоҳдан ўтишлари мумкинлигини кўзда тутувчи қонунни рад этган, ҳатто келишув комиссияси тузиш таклиф этилмаган эди.

Бунга Қонунчилик палатаси депутатлари норозилик билдирмоқда.

“Агар шундай бўлса, аввал Сенатдан сўраб, сўнг қонунни қабул қилайлик”, – деди депутат Дониёр Ғаниев Олий Мажлис юқори палатаси рад этган қонун ҳақида.

“Миллий тикланиш” лидери Алишер Қодиров эса қонунга партия фракцияси қаршилик қилганини айтган.

Шунингдек, депутат Расул Кушербаев ўз Telegram каналида Қонунчилик палатаси томонидан 2022 йил 21 июнда қабул қилинган ва 2022 йил 4 августда Сенат томонидан рад этилган “Ўзбекистон Республикасининг Оила кодексига ўзгартириш киритиш тўғрисида”ги қонун лойиҳаси Қонунчилик палатасида қайта кўриб чиқишдан олиб ташланиб, Вазирлар Маҳкамасига юбориш ҳақидаги масалани депутатларнинг кўпчилиги қўллаб-қувватламагани ҳақида ёзди.

Кушербаевнинг таъкидлашича, депутатлар Сенат рад этган ушбу қонун лойиҳаси жамият учун муҳим ва амалиётда одамларни ортиқча сарсон бўлишининг олдини олади, деб ҳисоблашади ва бир қатор депутатлар ваколатдан фойдаланиб қонун лойиҳасини қайта қабул қилиб, тўғридан-тўғри Президентга имзога юбориш зарурлигини билдирмоқда.

Бироқ шу кунгача депутатлар ушбу ваколатдан фойдаланишмаган.

“Қонун лойиҳасида:

– ФҲДЁ органи томонидан никоҳ тузишга бир ойда рухсат берувчи қоидани чиқариб ташлаш;

– эллик ёшдан ошган никоҳланувчи ёки ўртада боласи бўлган никоҳланувчи шахслар, шунингдек, ҳомиладор аёл ва туғилажак фарзандни ўз боласи, деб тан олувчи шахс учун тиббий кўрикдан ўтиш ихтиёрий эканлигини белгилаш кўзда тутилган.

Бизнингча лойиҳадаги таклифлар ҳаётий ва зарур аҳамиятга эга”, – дейди Расул Кушербаев.

• Алишер Қодиров
• Oila
• Олий Мажлис
• Қонунчилик палатаси
• Rasul Kusherbayev
• Сенат