Украина Россияга Қора денгиздаги жангларни тўхтатишни таклиф қилди

Украина Россияга Қора денгиздаги фуқаролик объектларига қаратилган ҳужумларни ўзаро тўхтатишни таклиф қилди. Бу ҳақда масаладан хабардор манбага таяниб, “Реутерс” хабар берди.

Манбага кўра, Киев ушбу таклифни учинчи томон орқали Москвага етказган. Ҳозирча Россия томонидан расмий жавоб берилмаган.

Сўнгги ҳафталарда Қора денгиздаги кемалар ва портларга уюштирилаётган ҳужумлар кучайиб, жаҳон озиқ-овқат таъминоти бўйича хавотирларни оширган. Россия ва Украина дунёнинг йирик қишлоқ хўжалиги маҳсулотлари экспортчилари ҳисобланади. Томонлар эса бир-бирини экспорт учун фойдаланилаётган кемаларга ҳужум қилишда айблаб келмоқда.

Жорий йилнинг июль ойи охирида Россия томонидан ўнлаб кемаларга зарбалар берилгач, кўплаб кема эгалари Одесса вилоятидаги портларга қатновни тўхтатган. Шу сабабли, Украина юк ташишнинг муқобил йўналишларидан фойдаланишга мажбур бўлмоқда. Одесса мамлакатнинг дон экспортидаги асосий марказлардан бири ҳисобланади.

Ўз навбатида, Украина ҳужумидан сўнг Россия Қора денгиздаги Новороссийск портининг учала терминалида ҳам жорий йилнинг 13 ва 14 август кунлари операцияларни тўхтатган. Бу эса Россиянинг дон экспортини янада қисқартиришига олиб келиши мумкин. Кремль ва Россия Ташқи ишлар вазирлиги Реутерсънинг изоҳ сўровига дарҳол жавоб бермаган.

Россия Ташқи ишлар вазири ўринбосари Алдександир Грушко эса Москва Қора денгиз бўйича расмий сулҳ таклифини олмаганини айтган.

“Сўнгги пайтларда турли мораторийлар ва сулҳлар ҳақида кўплаб чақириқларни эшитяпмиз. Бу ғоялар турли каналлар орқали илгари сурилмоқда, бироқ бизга ҳеч қандай расмий таклиф келиб тушмаган”, деган у ТАСС агентлигига.

Маълум қилинишича, Россия 2022 йилда Украинага бостириб кирганидан кейин БМТ ва Туркия воситачилигида Украина донининг экспортини давом эттиришга имкон берувчи келишув тузилган. Бироқ Россия 2023 йилда ушбу битимни узайтиришдан бош тортган.

Шундан сўнг, Украина янги денгиз йўлагини ишга туширган ва у яқиндаги кескинлашувгача фаолият юритиб келган. Киевга кўра, темир йўл ёки Дунай дарёси орқали амалга ошириладиган муқобил экспорт йўналишлари жуда чекланган.