Хоразм вилояти Ҳазорасп тумани ободонлаштириш бўлими ходимлари ҳудудда яшовчи болалар эгасиз итлар туфайли мактабга боролмаётгани бўйича аҳоли шикоятини инобатга олган ҳолда 13 та эгасиз ва дайди итни заҳарли хўрак ёрдамида ўлдирди. Бу ҳақда Ҳазорасп тумани ҳокимлиги Матбуот хизмати маълум қилган.

Ижтимоий тармоқларда дайди итлар сабабли туманнинг “Зеҳнли” маҳалласи болалари мактабга бора олмаётгани ҳақида хабар тарқалган эди. Унда итларни отиб ўлдириш эмас, балки махсус қўриқхоналар очиб, қаровсиз жониворларни ўша ерга жойлаштириш ва ҳолат назоратга олиниши сўралган.

Ҳазорасп тумани ободонлаштириш бўлимининг Қаровсиз қолган дайди ҳайвонларни ушлаш ва йўқ қилиш бўлинмаси ходимлари маҳалладаги дайди итларнинг 13 тасини заҳарли хўрак ёрдамида ўлдирган.

Вазирлар Маҳкамасининг “Қаровсиз қолган ҳайвонларни тутиш ва сақлаш билан боғлиқ хизматлар фаолиятини такомиллаштириш чора-тадбирлари тўғрисида”ги қарорига кўра, кўчаларда ва бошқа жойларда қаровсиз қолган, шу жумладан, эгасиз итлар ушланиб, вақтинча сақлаш учун махсус жойларга олиб кетилиши керак.

Таъкидлаш керакки, одамлар ва ҳайвонларга жароҳат етказган ёхуд ножўя ҳаракат қилинмаганда, уларга ҳужум қилган ҳайвонларни кейинчалик карантин қилиш учун ветеринария ва чорвачиликни ривожлантириш бўлимларига етказиш белгиланган. Ҳатто қутуриш ҳолати аниқланган тақдирда ҳам карантин ва таҳдид зонасидаги қутуришга мойил барча ҳайвонлар профилактик ваксинация қилиниши белгиланган.

• Ободонлаштириш
• Хоразм