15 декабрь санасида Европа Иттифоқи Россияга нисбатан 20-санкциялар пакетини қабул қилди. Ташкилотга аъзо давлатлар ташқи ишлар вазирлари 17 нафар жисмоний ва юридик шахсга қарши янги чеклов чораларини маъқуллади. Бу ҳақда ЕИнинг расмий сайтида хабар берилди.

Мазкур чоралар Европа Иттифоқининг 20-санкциялар пакети доирасига киради ва жумладан, “соя флоти”га қарши йўналтирилган. Шунингдек, санкциялар рўйхатига илк бор АҚШ фуқароси ҳам киритилди.

Хусусан, рўйхатга MGIMO халқаро муносабатлар факультети декани Андрей Сушенсов, Россия Халқаро ишлар кенгаши бош директори, “Валдай” клуби дастур директори Иван Тимофеев, “Валдай” мунозара клубини ривожлантириш ва қўллаб-қувватлаш жамғармаси кузатув кенгаши раиси Андрей Бистритский, “Россия глобал сиёсатда” журнали бош муҳаррири, “Валдай” клубининг илмий ишлар бўйича директори Федор Лукянов, украиналик журналист Диана Панченко ҳамда Флоридада илгари шериф ёрдамчиси бўлган Жон Марк Дуган киритилган. Улар “Россиянинг интернетдаги ахборот операцияларини қўллаб-қувватлагани” учун санкция остида қолган.

ЕИ маълумотларига кўра, Жон Марк Дуган 2016 йилда сиёсий бошпана сўраганидан сўнг Россия фуқаролигини олган. Шунингдек, уч нафар Россия Федерацияси Қуролли кучлари Бош штаби Бош разведка бошқармаси офицерига нисбатан ҳам чекловлар жорий этилган.

Бундан ташқари, санкциялар рўйхатига Швейсария махсус хизматининг собиқ офицери Жак Бо, франциялик эксперт Ксаве M ҳамда учта кема қатнови компанияси – БААга тегишли Citrine Marine SPC ва Nova Shipmanagement LLC-FZ ҳамда Ветнамнинг Hung Phat Maritime Trading компанияси ҳам киритилган. 

• Россия
• Санкция
• Yevropa Ittifoqi