АҚШ президенти Доналд Трамп BBC корпорациясини туҳмат қилишда ва савдо амалиёти тўғрисидаги қонунни бузишда айблади. Даъво аризаси берилишидан аввалроқ BBC ҳуқуқшунослари эътирозларга батафсил жавоб йўллаб, монтаждан ёмон мақсад кўзланмаганини ва дастур Трампга зарар етказмаганини билдирган. Чунки Трамп кўрсатув эфирга чиққанидан кўп ўтмай қайта сайланган. Шунингдек, улар BBC'да дастурни АҚШ ҳудудида тарқатиш ҳуқуқи бўлмаганини ҳам таъкидлаган.

Трамп эътироз билдирган Panorama дастури 2024 йил октябрь ойида BBC телеканалида эфирга узатилган. Унда АҚШ президентининг 2021 йил 6 январда, Капитолий штурми куни, айтган нутқидан икки парча бир-бирига уланиб намойиш этилган. Натижада Трамп йиғилганларни тўғридан-тўғри тартибсизлик ва зўравонликка чорлаётгандек таассурот пайдо бўлган.

Можаро 2025 йил ноябрида корпорациянинг ички ҳужжати сизиб чиқиб кетгач авж олди. Шундан сўнг жамоатчиликда BBC'га нисбатан журналистик бетарафлик тамойилларини бузганлик, жумладан Трампнинг нутқини монтаж қилиш борасида айбловлар янгради. 11 ноябрь куни BBC бош директори Тим Дейви ва янгиликлар бўлими раҳбари Дебора Тернесс истеъфога чиқди. Орадан бир неча кун ўтиб, BBC дастурдаги монтаж учун расман узр сўради.

• Shikoyat
• Суд
• Трамп