Украина президенти Володимир Зеленский Россия Қуролли Кучлари эҳтиёжларини таъминловчи 322 компанияга қарши санкциялар қўйди. Бу ҳақда Зеленский ўзининг видеомурожаатида айтиб ўтди.

Зеленский Миллий хавфсизлик ва мудофаа кенгашининг Россияга қарши янги санкциялар ҳақидаги қарорини маъқуллаганини таъкидлади.

Санкциялар биринчи навбатда Россия ҳарбий-саноат комплексига қаратилган эди. Чекловлар 322 та компания, жумладан, қурол-яроғ, бутловчи қисмлар ва шунга ўхшаш ишлаб чиқарувчиларга нисбатан жорий этилди.

“Бошқа санкциялар рўйхатига Россияга санкцияларни четлаб ўтишга ёрдам берадиган ҳамда Россия Федерациясида ҳам, Украинада ҳам эркинликни йўқ қилишда иштирок этган юридик ва жисмоний шахслар ҳам бор”, – деди Зеленский.

Унинг таъкидлашича, барча санкциялар пакетлари “муфассал равишда ишлаб чиқилмоқда”.

“Шунга кўра, Россияга қарши санкциялар режими қанчалик қаттиқроқ бўлса, террорчи давлат ва унга алоқадор барча шахсларга, бутун Россия уруш иқтисодиётига нисбатан чекловлар шунчалик кўп бўлса, тажовуз шунчалик тез тугайди”, – деди Зеленский.

• Россия
• Санкция
• Зеленский