O‘zbekiston inson huquqlari “Ezgulik” jamiyati raisi Abdurahmon Tashanov o‘zining Facebook sahifasida joylashtirgan postida Toshkent viloyatida joylashgan “Tovoqsoy” qamoqxonasida saqlanayotgan 20-yoshli maxbus Alisher Yakubov o‘zini yuqori qavatdan tashlab o‘z joniga qasd qilgani haqida yozgan va buni qamoqxona xodimlarining muntazam qiynoqlari natijasida yuzaga kelgan deb o’ylashini ta’kidlagan. Uning fikricha, qamoqxona rasmiylari ushbu xodisa haqida bor haqiqatni ochiqlamay yashirishadi.

“20 yashar Alisher Yakubov 2020-yilning fevralida 10 yilga qamalgan. U shu yilning 25-iyunida o‘z joniga qasd qilgan, o‘zini yuqori qavatdan tashlagan.

Hozir bir ahvolda “Sangorod”da yotibdi. Shu yilning yanvarida otasi Elmurod akaga o‘zining muntazam qiynoqlarga tutilayotgani haqida xat yozgan.

“So‘nggi marta o‘g‘lim 20 yoshga to‘lgan 10-aprel kuni onasi bilan birgalikda ko‘rib kelgandik. Ertasigayoq bolamni karserga yopishibdi”, – deydi Elmurod Yakubov.

Uning aytishicha, Alisher joniga qasd qilgani haqida oradan 4 kun o‘tib, yaqinlariga xabar berishibdi. Orada mazkur hodisa bo‘yicha bir odamni ishdan bo‘shatishibdi. Surishtiruv xulosalari borasida esa hech nima deyishmayotgan ekan.

Sud hukmi bilan qamalgan bu yigitcha panjara ortiga kirganida 18 yoshda edi. Bosh miyasida bolalikdan jarohati bor ekan, “Ezgulik”ka qilgan murojaatiga qo‘shib bir dunyo tibbiy xulosalarni ham taqdim qilishgan boyaqishlar.
Talabi – qiynoqqa solgan o‘sha zo‘rovonlarga nisbatan chora ko‘rdirish ekan, advokatga qo‘li kalta ota-onaning. Koloniya ma’muriyati esa bolaning o‘zini irodasizlikda ayblamoqda.

Ko‘rinadiki, irodasiz bo‘lsangiz, qamoqqa tushmang. Aks holda, siz uchun hech kim javob bermaydi. Rasmiylar bunday noxush hodisani yashirishadi, go‘yo hamma yoq chaman, gullab ketgan, yashnab ketgan.

Bilamizki, inson huquqlari bo‘yicha Milliy markaz konstitusiyaviy islohotlar bilan band. Unda qiynoqqa qarshi milliy preventiv mexanizmlar guruhi qani? Ombudsman qayerda?

Biz yangi qomusimiz loyihasini inson huquqlariga oid go‘zal normalar bilan to‘ldirayotgan pallada irodasizlar joniga qasd qilib o‘tiribdi. Ertaga soha mulozimlari bu masala bo‘yicha jimjimador bayonot qilishsa kerak. Hartugul, bunga ko‘nikib qoldik.

Irodangizni mustahkamlang! Zo‘rovonlik qarshisida dovdirab qolmang, aksincha biz ham bu negativ holatlarni yozaverishdan zerikib qolamiz.

Darvoqe, o‘g‘limga zulm qilayotganlarning buyurtmachilari tashqarida", deydi alamzada ota.

“Bunaqa demang-yey, ishlam kallamay qoladi, bizning qamoqlarimiz eng mustahkam qo‘rg‘on” dedim faxrlanib”, – deb yozadi O‘zbekiston inson huquqlari faoli “Ezgulik” jamiyati raisi Abdurahmon Tashanov o‘zining Facebook sahifasida.

• Abdurahmon Tashanov
• Qamoqxona