Kitob mutolaa qilish eng foydali mashgʻulotlardan biri boʻlib, u aqliy salohiyatni va savodxonlik darajasini oshirishga yordam beradi, bir qator kasalliklarning oldini oladi. Zamonaviy odamlar gadjetlar bilan band boʻlib qolgan bir vaqtda kitob oʻqishni odat tusiga aylantirish oson boʻlmaydi. Bizning tavsiyalar bu borada sizga yordam beradi degan umiddamiz.

Adabiyotlar roʻyxatini tuzib oling

Kitob oʻqishga boʻlgan istakni paydo qiluvchi asosiy narsa – sizni qiziqtiradigan adabiyotlar roʻyxatini tuzib olishdir. Bu maqsadda qidiruv tizimlaridan foydalanish, kutubxonaga tashrif buyurish, kitobsevarlardan maslahat soʻrashingiz mumkin.

Mutolaa uchun vaqt ajrating

Kitob oʻqishni kundalik hayotingizning bir qismiga aylantirish uchun har kuni 10-20 daqiqa vaqtni mutolaa uchun ajrating. Shundan keyin jarayon davomiyligi asta-sekin uzaytirib boring. Oradan bir muddat oʻtib, kuniga bir necha sahifani hech bir muammosiz oʻqiy oladigan boʻlasiz.

Jarayondan zavq olishni oʻrganing

Kitob oʻqishni odat tusiga kiritish uchun har bir kitob mutolaasidan zavq ola bilishingiz kerak. Kitob oʻqish bilan shunchaki shugʻullanishdan foyda yoʻq, u sizning hordiq chiqarishingizga yordam beruvchi, muammolardan uzoqlashtiruvchi, yangi gʻoyalar taqdim etuvchi va hayotga oʻzgacha nazar tashlashga undovchi mashgʻulot boʻlishi kerak. Jarayondan zavq olishni uddalasangiz, mutolaa uchun vaqt ajratish siz uchun muammo boʻlmay qoladi.

Mutolaa uchun qulay sharoit yarating

Kitobni shovqin boʻlmagan, sizni chalgʻituvchi omillardan holi joyda, smartfon va boshqa turdagi gadjetlarning barchasini oʻchirib qoʻygan holatda oʻqish tavsiya etiladi. Kitobni yolgʻizlikda mutolaa qilish uni yanada yoqimliroq mashgʻulotga aylantiradi.

Tonggi palla – kitob oʻqish uchun eng yaxshi payt

Odam endigina uygʻongan vaqtda ortiqcha xayollardan holi boʻladi. Kunning ilk soatlarida mutolaa qilish esa kun davomida sizga tetiklik bagʻishlaydi, ish unumdorligining oshishiga yordam beradi.

• layfxak
• qiziqarli