Besh karra “Oltin to‘p” sohibi, portugaliyalik futbolchi Krishtianu Ronaldu jurnalist Pirs Morgan bilan intervyuda AQSh prezidenti Donald Trampni yoqtirishini aytib, o‘zini undan mashhurroq inson deb hisoblashini aytdi.

Ronaldu Trampni “dunyodagi eng muhim odamlardan biri” deb atagan va u bilan shaxsan uchrashishni istashini ham qo‘shimcha qilgan.

“Kim mashhurroq — menmi yoki Tramp? Shu mavzuda bahs tashkil qilaylik. Men Trampdan ham mashhurroqman, hattoki eng kichik orollarda ham meni tanishadi. Menimcha, dunyoda mendan mashhurroq odam yo‘q. Lekin ochig‘i, men hech qachon bu qadar mashhur bo‘lishni istamaganman, faqat muvaffaqiyatli inson bo‘lishni xohlaganman”, – degan Krishtianu.

Ma’lumot uchun, 2024-yilda Krishtianu Ronaldu ijtimoiy tarmoqlarda 1 mlrd obunachiga ega bo‘lgan ilk insonga aylangandi. Shulardan 667 mln — Instagram’da, 77 mln — YouTube’da, 113 mln esa X (sobiq Twitter) ijtimoiy tarmog‘ida.

Eslatib o‘tamiz, 2023-yildan beri Saudiya Arabistonining “An-Nassr” jamoasi sharafini himoya qilib kelayotgan Ronaldu, bunga qadar Portugaliyaning “Sporting”, Angliyaning “Manchester Yunayted”, Ispaniyaning “Real Madrid” va Italiyaning “Yuventus” kabi jamoalarida faoliyat olib borgan.

• Futbol
• Intervyu
• Mashhurlik
• Ronaldu
• Tramp