Yaponiyada noqonuniy yashab kelgan ikki nafar O‘zbekiston fuqarosi mamlakatdan chiqarib yuborildi. Bu haqda O‘zbekistonning Yaponiyadagi elchixonasi ma’lum qildi.

Ma’lum qilinishicha, ulardan biri Yaponiyaga talaba vizasi bilan kirgan, biroq o‘qishdan chetlatilgach ham mamlakatni tark etmagan va noqonuniy yashab kelgani uchun qo‘lga olingan. Ikkinchi fuqaro esa qisqa muddatli viza bilan kirib, ruxsat etilgan muddat tugaganiga qaramay chiqib ketmagan.

Yaponiya tomoni eslatishicha, qisqa muddatli vizalar bilan ishlash qat’iyan taqiqlangan. Talaba vizasi esa faqat ta’lim olish uchun beriladi va o‘qish to‘xtatilsa, yashash maqomi ham bekor qilinadi.

“Turizm” yoki “talaba” vizasi orqali Yaponiyada uzoq muddat qolish yoki ishlash mumkinligi haqidagi gaplar haqiqatga to‘g‘ri kelmaydi. Noqonuniy yashayotgan shaxslar aniqlansa, ular hibsga olinadi va deportatsiya qilinadi.

Shuningdek, bunday holatlar bo‘yicha ma’lumotlar O‘zbekiston tomoniga ham yetkazilishi, natijada fuqaro vatanga qaytgach ham tegishli choralar ko‘rilishi mumkinligi ta’kidlangan.